જૂનાગઢ: હવામાન વિભાગ દ્વારા ભારે વરસાદનું અનુમાન લગાવવામાં આવ્યુ છે. ત્યારે આવનારા 24 કલાક દરમિયાન જૂનાગઢ સોમનાથ સહિત સમગ્ર સોરઠ પંથકમાં ભારે વરસાદ પડવાની શક્યતાઓ હવામાન વિભાગે વ્યક્ત કરી છે. તેની વચ્ચે પાછલા 48 કલાકથી સમગ્ર સોરઠ પંથક વરસાદ વગર કોરો જોવા મળે છે.
રવિવારે જુનાગઢ જિલ્લાના મેંદરડા વિસાવદર અને જુનાગઢ શહેરમાં નોંધપાત્ર વરસાદ પડ્યો હતો. ત્યારબાદથી વરસાદે વિરામ લીધો છે. અને ફરી એક વખત અસહ્ય બફારાનું વાતાવરણ ઊભું થયું છે. રવિવારે બપોર બાદ અચાનક વાતાવરણમાં જોરદાર પલટો આવ્યો હતો. અને બે કલાક દરમિયાન એક થી ત્રણ ઇંચ જેટલો વરસાદ પડતા વાતાવરણમાં ઠંડક પ્રસરી હતી, પરંતુ ત્યારબાદ વરસાદે વિરામ લેતા ફરી એક વખત અસહ્ય બફારાનું પ્રમાણ પણ જોવા મળે છે.
વિસાવદર મેંદરડામાં નોંધપાત્ર વરસાદઃ પાછલા 48 કલાકની વાત કરીએ તો વિસાવદર તાલુકામાં 124 mm, મેંદરડામાં 91 mm, જુનાગઢમાં 60 mm, માળિયા હાટીના માં 40 mm, કોડીનારમાં 17 mm, સુત્રાપાડા મા 06 mm, વેરાવળ પાટણ માં 16 mm, તાલાળામાં 64 mm અને કેશોદમાં 10 mm ની સાથે માંગરોળમાં 11 mm,ઉનામાં 03 mm અને ગીર ગઢડામાં માત્ર 01 mm વરસાદ નોંધાયો છે.
ઉપરાંત, આજે ફરી એક વખત હવામાન વિભાગે સમગ્ર સોરઠ પંથકમાં નોંધપાત્ર વરસાદ પડવાની શક્યતાઓ વ્યક્ત કરી છે તેની વચ્ચે આજે સોરઠ પંથકમાં વરસાદી વાતાવરણ જોવા મળી રહ્યું છે. પરંતુ વરસાદ પડે તે પ્રકારનું વાતાવરણ હજુ સુધી સર્જાયું નથી જેને કારણે ગરમી અને બફારાના પ્રમાણમાં પણ ખૂબ વધારો થયો છે.
