હૈદરાબાદઃ ગુજરાત ટાઇટન્સના કેપ્ટન શુભમન ગિલ પર 12 લાખ રૂપિયાનો દંડ ફટકારવામાં આવ્યો છે. બુધવારે ગુજરાત ટાઇટન્સ અને ચેન્નાઇ સુપર કિંગ્સ વચ્ચે મેચ હતી. આ મેચમાં ધીમી ઓવર ફેંકવા બદલ તેને દંડ ફટકારવામાં આવ્યો હતો. IPL દ્વારા જારી કરવામાં આવેલા નિવેદનમાં કહેવામાં આવ્યું છે કે આ સિઝનમાં મિનિમમ ઓવર સ્પીડ સંબંધિત આચાર સંહિતા હેઠળ તેમની ટીમનો આ પહેલો ગુનો હતો, તેથી 12 લાખ રૂપિયાનો દંડ ફટકારવામાં આવ્યો છે.
ગુજરાત ટાઇટન્સની સૌથી મોટી હાર: ચેન્નાઈ સુપર કિંગ્સે ગુજરાત ટાઇટન્સને 63 રને હરાવીને આ સિઝનમાં સતત બીજી જીત નોંધાવી છે. CSK દ્વારા આપવામાં આવેલા 207 રનના ટાર્ગેટનો પીછો કરતા ગુજરાત ટાઇટન્સ 20 ઓવરમાં 8 વિકેટના નુકસાને માત્ર 143 રન જ બનાવી શકી અને 63 રનથી હારી ગઈ. ગુજરાત તરફથી સૌથી વધુ સ્કોરર સાઈ સુદર્શન હતો જેણે 37 રનની ઇનિંગ રમી હતી. જ્યારે ચેન્નાઈ સુપર કિંગ્સ માટે દીપક ચહર, મુસ્તફિઝુર રહેમાન અને તુષાર દેશપાંડેએ 3-3 વિકેટ લીધી હતી.
શિવમ દુબેની શાનદાર ઇનિંગ: ચેન્નાઈ સુપર કિંગ્સનો ડાબોડી બેટ્સમેન શિવમ દુબે પ્લેયર ઓફ ધ મેચ બન્યો હતો. દુબેએ 23 બોલમાં 5 છગ્ગા અને 2 ચોગ્ગાની મદદથી 51 રનની શાનદાર ઇનિંગ રમી હતી. દુબેએ તેની 7મી અડધી સદી ફટકારી હતી. પ્રથમ વખત IPLમાં કપ્તાની કરી રહેલા ગિલના નેતૃત્વ હેઠળ, ટાઇટન્સે મુંબઇ ઇન્ડિયન્સ (MI) સામેની તેમની પ્રથમ મેચ 6 રનથી જીતી હતી.
