નવી દિલ્હીઃ આમ આદમી પાર્ટીના વરિષ્ઠ નેતા અને રાજ્યસભાના સાંસદ સંજય સિંહે વડાપ્રધાન કાર્યાલય, ભાજપ અને વડાપ્રધાન પર દિલ્હીના મુખ્યમંત્રી અરવિંદ કેજરીવાલની હત્યાનું કાવતરું ઘડવાનો આરોપ લગાવ્યો છે. સંજય સિંહે કહ્યું, 'અરવિંદ કેજરીવાલને રાજીવ ચોક, પટેલ ચોક મેટ્રો સ્ટેશન પર એક લેખિત સંદેશમાં ધમકી આપવામાં આવી છે. જો અરવિંદ કેજરીવાલને કંઈ થશે તો તેના માટે પીએમ, પીએમઓ અને ભાજપ જવાબદાર રહેશે. આમ આદમી પાર્ટીના તમામ ધારાસભ્યો અને મંત્રીઓ ચૂંટણી પંચને પત્ર લખશે, તેમને મળવા અને સમય લઇને ફરિયાદ કરશે. સંજય સિંહે કહ્યુ હતું કે, ભાજપ તેમને એટલી નફરત કરે છે કે તે તેમનો જીવ લેવા તૈયાર છે.
અરવિંદ કેજરીવાલની હત્યાનો પ્રયાસ: રાજ્યસભાના સાંસદ સંજય સિંહે આરોપ લગાવ્યો કે, "ભાજપે ભૂતકાળમાં પણ અરવિંદ કેજરીવાલની હત્યા કરવાનો પ્રયાસ કર્યો છે. તેમને જેલમાં ઇન્સ્યુલિન પણ આપવામાં આવ્યું ન હતું. તેમનો જીવ લેવાનું સંપૂર્ણ કાવતરું ઘડવામાં આવ્યું હતું. સુપ્રીમ કોર્ટે આ ષડયંત્રને સમજી લીધું છે." અને અરવિંદ કેજરીવાલને જામીન આપ્યા. પટેલ નગર અને રાજીવ ચોક મેટ્રો સ્ટેશન પર અરવિંદ કેજરીવાલ પર હુમલાની ધમકીઓ લખવામાં આવી રહી છે.
સંજય સિંહે લગાવ્યો ગંભીર આરોપ: સંજય સિંહે કહ્યું, "મારો સીધો આરોપ છે કે ભારતીય જનતા પાર્ટી આ હુમલાને અંજામ આપવાની તૈયારી કરી રહી છે. તેનું સમગ્ર ઓપરેશન પીએમઓ અને દેશના વડાપ્રધાન નરેન્દ્ર મોદી કરી રહ્યા છે. પીએમ મોદી, ભાજપ, પીએમઓની નફરતની રાજનીતિની ભાવનામાં એટલા આગળ વધી ગયા છે કે, તેઓ અરવિંદ કેજરીવાલનો જીવ પણ લઈ શકે છે.
આમ આદમી પાર્ટી ચૂંટણીપંચને પત્ર લખશે: સંજય સિંહે કહ્યું કે, હું સરકાર, પ્રશાસન અને ચૂંટણી પંચને કહેવા માંગુ છું કે, અરવિંદ કેજરીવાલ પર ગમે તે હુમલાની તૈયારી કરવામાં આવી રહી છે. જો આવું કંઈ થશે તો પીએમ મોદી, પીએમઓ અને ભાજપ સીધા જ જવાબદાર રહેશે. આમ આદમી પાર્ટીના તમામ ધારાસભ્યો અને મંત્રીઓ ચૂંટણી પંચને પત્ર લખીને આ અંગે ફરિયાદ કરશે. ટૂંક સમયમાં મળીને ફરિયાદ કરી કાર્યવાહીની માંગણી કરશે.
