ગોધરા : તાજેતરમાં પૂર્ણ થયેલ NEET પરીક્ષા દરમિયાન સારા માર્ક્સ સાથે પાસ થવાનું કૌભાંડ ગોધરામાં પ્રકાશમાં આવ્યું હતું. પંચમહાલ જિલ્લા કલેક્ટર આશિષકુમારે એક બાતમીના આધારે ગોધરામાં જય જલારામ સ્કૂલમાં દરોડો પાડ્યો હતો, જેમાં ડેપ્યુટી સેન્ટર સુપરિન્ટેન્ડેન્ટ, વડોદરાના રોય ઓવરસીઝના માલિક અને ગોધરાના લઘુમતી સમુદાયના આગેવાનના નામ ખુલ્યા હતાં. આ તપાસ દરમિયાન વડોદરામાં રહેતા ગોધરાના શિક્ષકની કારમાંથી સાત લાખ રોકડા પણ મળી આવ્યા હતાં, જે બાદ જિલ્લા શિક્ષણાધિકારી દ્વારા ત્રણ લોકો સામે ફરિયાદ નોંધવામાં આવી હતી અને આરોપીઓની ધરપકડ કરવાની કાર્યવાહી શરૂ કરવામાં આવી હતી.
NEETની પરીક્ષામાં ગેરરીતિ : સૂત્રોના જણાવ્યા અનુસાર પંચમહાલ જિલ્લા કલેક્ટર આશિષકુમારને 5 મેના રોજ માહિતી મળી હતી કે શાળામાં ફરજ બજાવતો શિક્ષક તુષાર ભટ્ટ ગોધરાના પરવડી ચોક પાસે આવેલી જય જલારામ સ્કૂલમાં લેવાનારી NEETની પરીક્ષામાં ગેરરીતિ આચરતો હતો. આ સૂચનાના આધારે જિલ્લા શિક્ષણાધિકારી કિરીટકુમાર મણીલાલ પટેલ સહિત ત્રણ ઉચ્ચ અધિકારીઓએ શાળામાં દરોડો પાડ્યો હતો. દરમિયાન જિલ્લાના અધિક નિવાસી કલેક્ટર મહિપાલસિંહ ડી.ચુડાસમા પણ ઘટના સ્થળે પહોંચી ગયા હતા. તેઓ પરીક્ષા કેન્દ્ર પર પહોંચ્યા અને કેન્દ્ર અધિક્ષક કેતકી પટેલ અને તેમની ટીમને પરીક્ષાની ફરજ રાબેતા મુજબ કરવા જણાવ્યું. કેન્દ્રના અધિક્ષક તુષાર રજનીકાંત ભટ્ટની પોલીસની હાજરીમાં પૂછપરછ કરવામાં આવી હતી. જેનો લેખિત અહેવાલ કલેક્ટરને મોકલી આપ્યો હતો.
નીટ પરીક્ષામાં ગેરરીતિના આરોપીઓ : તુષાર ભટ્ટની પૂછપરછ દરમિયાન તેની પાસેથી બે મોબાઈલ ફોન મળી આવ્યા હતા. જેમાંથી એક મોબાઈલમાં પરશુરામ રોયના નામે સેવ કરેલા વોટ્સએપ ગ્રુપમાં કેટલીક ગંભીર માહિતી મળી હતી. 16 વિદ્યાર્થીઓના નામ, રોલ નંબર, પરીક્ષા કેન્દ્રોના સરનામા વગેરે જેવી વિગતો મળી આવી હતી. જ્યારે તુષાર ભટ્ટને આ વિશે પૂછવામાં આવ્યું તો તેણે જણાવ્યું કે પરશુરામ રોય વડોદરામાં રોય ઓવરસીઝના માલિક છે. મેસેજમાં જણાવેલ ઉપરોક્ત વિદ્યાર્થીઓ તમારી શાળામાં પરીક્ષા આપવાના છે જેના પેપર ઉકેલવા અને સારા માર્ક્સ સાથે પાસ થવા માટે વિદ્યાર્થી દીઠ દસ લાખ રૂપિયા ચૂકવવાનું નક્કી કરવામાં આવ્યું હતું. તેવી જ રીતે 20 નામો સાથેના ઉમેદવારોની બીજી યાદી પણ બહાર આવી હતી. જેમાંથી છ ઉમેદવારોના નામ પર લાલ રંગની પેનથી નિશાની કરવામાં આવી હતી. આ યાદી ગોધરાના આરીફ વોરાએ આપી હતી.
સાત લાખ રોકડા આપવામાં આવ્યા : દરેક વિદ્યાર્થી માટે દસ લાખ રૂપિયા રાખવામાં આવ્યા હતાં જેથી ઉમેદવાર NEET પરીક્ષામાં મેરિટમાં સ્થાન મેળવી શકે. જે અંતર્ગત સાત લાખ રોકડા આપવામાં આવ્યા હતાં. જેને ગોધરાના શિક્ષક તુષાર ભટ્ટની સ્વિફ્ટ ડિઝાયર કારમાં રાખવામાં આવ્યા હતાં. જેના આધારે જિલ્લા શિક્ષણાધિકારી અને તેમની ટીમે તમામ દસ્તાવેજો કબજે કરી તુષાર ભટ્ટને કોર્ટમાં હાજર રહેવા નોટિસ આપી હતી.
પરશુરામ રોય સામે ગુનો નોંધાયો : આ મામલે ગઈકાલે પોલીસમાં ફરિયાદ નોંધાયા બાદ પોલીસે વડોદરા સ્થિત રોય ઓવરસીઝના માલિક પરશુરામ રોય, તુષાર રજનીકાંત ભટ્ટ અને ગોધરાના આરીફ વોરા સામે ગુનો નોંધીને કાર્યવાહી શરૂ કરી હતી. પરશુરામ રોયની પણ વડોદરા પોલીસે વડોદરાના ગેંડા સર્કલ પાસેથી અટકાયત કરી ગોધરા પોલીસને હવાલે કર્યો હતો.
ફરાર બે આરોપીઓ પણ પકડાઇ ગયાં : તુષાર ભટ્ટ અને આસિફ વોરા ફરાર થઈ ગયા હતાં. જોકે, પોલીસે આરોપી પરશુરામ રોયને કોર્ટમાં રજૂ કર્યો હતો, જ્યાં કોર્ટે તેના 10 દિવસના રિમાન્ડ મંજૂર કર્યા હતા. જ્યારે પોલીસે ફરાર આરોપી તુષાર રજનીકાંત ભટ્ટ અને આરીફ નૂરમોહમ્મદ વોરાને પકડવા માટે અલગ-અલગ ટીમો બનાવી હતી. બંને આરોપીઓની ગુપ્ત માહિતી અને સર્વેલન્સના આધારે રાજસ્થાનના બાંસવાડામાંથી ધરપકડ કરવામાં આવી છે.
