નવી દિલ્હી : દિલ્હી હાઈકોર્ટે કહ્યું કે જ્યાં પ્રેમમાં નિષ્ફળતાના કારણે પ્રેમી આત્મહત્યા કરે છે, ત્યાં મહિલાને પુરુષને આત્મહત્યા માટે ઉશ્કેરવા માટે દોષી ઠેરવી શકાય નહીં.
આત્મહત્યા માટે ઉશ્કેરણાનો મામલો : જસ્ટિસ અમિત મહાજને ચુકાદો આપ્યો હતો કે નબળા અથવા અસ્વસ્થ મનના વ્યક્તિ દ્વારા લેવામાં આવેલા ખોટા નિર્ણયને અન્ય વ્યક્તિ દ્વારા આત્મહત્યા માટે ઉશ્કેરવા માટે દોષી ઠેરવી શકાય નહીં. કોર્ટે કહ્યું, "જો પ્રેમમાં નિષ્ફળતાને કારણે પ્રેમી આત્મહત્યા કરે છે, એક વિદ્યાર્થી પરીક્ષામાં તેના નબળા પ્રદર્શનને કારણે આત્મહત્યા કરે છે, કોઇ ગ્રાહક આત્મહત્યા કરે છે કારણ કે તેનો કેસ કાઢી નાખવામાં આવ્યો છે, તો મહિલા, પરીક્ષાર્થી, કે વકીલને આ આત્મહત્યા માટે ઉશ્કેરવા માટે દોષિત ન ઠેરવી શકાય.
કોર્ટની ટિપ્પણી : કોર્ટે એમ પણ કહ્યું હતું કે "નબળા મનના વ્યક્તિ દ્વારા લેવામાં આવેલા ખોટા નિર્ણય માટે અન્ય કોઈ વ્યક્તિને આત્મહત્યા માટે પ્રેરિત કરવા માટે દોષિત ઠેરવી શકાય નહીં." જસ્ટિસ મહાજને આત્મહત્યા માટે ઉશ્કેરવાના કેસમાં પુરુષ અને મહિલાને આગોતરા જામીન આપતાં આ ટિપ્પણી કરી હતી. આત્મહત્યા કરનાર વ્યક્તિના પિતાએ કરેલી ફરિયાદના આધારે એફઆઈઆર નોંધવામાં આવી હતી. અરજદાર પૈકી એક મહિલાના મૃતક સાથે પ્રેમ સંબંધ હતો. અન્ય અરજદાર કોમન ફ્રેન્ડ હતાં. આરોપ છે કે અરજદારોએ મૃતકને એમ કહીને ઉશ્કેર્યા હતા કે તેઓ એકબીજા સાથે શારીરિક સંબંધો ધરાવે છે અને ટૂંક સમયમાં લગ્ન કરશે.
આગોતરા જામીન આપ્યાં : દિલ્હી હાઈકોર્ટે એક નિર્ણયમાં કહ્યું છે કે જો પ્રેમમાં નિષ્ફળતાના કારણે પ્રેમી આત્મહત્યા કરે છે અને સુસાઈડ નોટમાં તેનું નામ લખે છે તો તેના આધારે આત્મહત્યા માટે ઉશ્કેરવાનો કેસ દાખલ કરી શકાય નહીં. જસ્ટિસ અમિત મહાજનની બેન્ચે એક યુવક યુવતીને આગોતરા જામીન આપતાં આ ટિપ્પણી કરી હતી.
ઘટનાની વિગત : 6 મે, 2023ના રોજ વિવેક વિહાર પોલીસ સ્ટેશનમાં નોંધાયેલી એફઆઈઆરમાં એક યુવક અને યુવતી વિરુદ્ધ આત્મહત્યા માટે ઉશ્કેરવાનો કેસ નોંધવામાં આવ્યો હતો. આ મામલે મૃતકના પિતાએ ફરિયાદ નોંધાવી હતી કે યુવક અને યુવતી એ તેમના પુત્રને આત્મહત્યા કરવા માટે ઉશ્કેર્યો હતો. ફરિયાદ અનુસાર, 29 એપ્રિલ 2023ના રોજ ગુરુગ્રામમાં મૃતક સાથે યુવક અને યુવતીનો ઝઘડો થયો હતો. લડાઈ પછી બીજા દિવસે, 30 એપ્રિલ, 2023 ના રોજ, મૃતકે આત્મહત્યા કરી અને સુસાઈડ નોટમાં તેના મૃત્યુ માટે યુવક અને યુવતી ને જવાબદાર ઠેરવ્યા હતાં. હાઈકોર્ટમાં સુનાવણી દરમિયાન અરજદાર યુવતીએ કહ્યું હતું કે તેણે મૃતકના વર્તન અને ઉત્પીડનના કારણે તેની સાથેના સંબંધોનો અંત લાવી દીધો હતો.
