২০২৩ চনটো পাৰ হ’বলৈ ওলাইছে ৷ কিছুদিন পিছতে পুৰণি বছৰটোক বিদায় দি নতুন বছৰটোক আদৰি ল’ব সকলোৱে ৷ বছৰটো শেষ হোৱাৰ লগে লগে মানুহে বছৰটোৰ ভিতৰত ঘটা ঘটনাবোৰৰ কথা মনত পেলাইছে৷ এই বছৰ বহু কেইটা বিষয়ে চৰ্চাত আছিল ৷ প্ৰতিটো খণ্ডতে কিবা নহয় কিবা দেখা গৈছিল, যিয়ে শিৰোনাম দখল কৰিছিল ৷ স্বাস্থ্য খণ্ডত এই বছৰো বহু ঘটনা দেখিবলৈ পোৱা গ’ল ৷
এইবাৰ দেশ আৰু বিশ্বত এনে বহু ৰোগৰ উন্মেষ ঘটিছিল, যিয়ে পুনৰ কৰ’না মহামাৰীৰ পিছত মানুহক চিন্তিত কৰি তুলিবলৈ বাধ্য কৰিলে ৷ এনে পৰিস্থিতিত বছৰ শেষ হোৱাৰ পূৰ্বে এই বছৰ ভাৰতত শিৰোনাম দখল কৰা এনে ৰোগৰ ওপৰত এবাৰ চকু ফুৰাওঁ আহক-
- ডেংগু
ডেংগু হৈছে মহৰ দ্বাৰা হোৱা এক ভয়াৱহ ৰোগ, যাৰ ফলত প্ৰায়ে কিছুমান বিশেষ ঋতুত মানুহে এই ৰোগত ভুগিবলৈ আৰম্ভ কৰে ৷ এই ৰোগত প্ৰতিবছৰে বিভিন্ন লোক আক্ৰান্ত হয় যদিও এইবাৰ দেশজুৰি প্ৰতিবছৰৰ তুলনাত এই ৰোগত আক্ৰান্তৰ ঘটনা অধিক হোৱাত সকলোকে চিন্তিত কৰি তুলিছিল ৷ কেৱল এয়াই নহয়, ভাৰতৰ কিছুমান চুবুৰীয়া দেশতো ডেংগুৱে বিধ্বংসী ৰূপ ধাৰণ কৰিছিল ৷
- কনজাংটিভাইটিছ
এইবাৰ কনজাংটিভাইটিছৰ ক্ষেত্ৰতো মানুহৰ মাজত যথেষ্ট অসুবিধাৰ সৃষ্টি হৈছিল ৷ এয়া হৈছে এক চকুৰ সংক্ৰমণ, যিয়ে প্ৰায়ে বাৰিষাৰ সময়ত মানুহক ইয়াৰ কবলত পেলায় ৷ কিন্তু বিগত বছৰৰ তুলনাত এই বছৰ ইয়াৰ ৰোগীৰ সংখ্যা অধিক বৃদ্ধি পাইছে, যাৰ বাবে অধিক ৰোগীৰ ৰিপৰ্ট পোৱা গৈছিল আৰু ই জনসাধাৰণৰ মাজত এতিয়াও ই এক চিন্তাৰ কাৰণ হৈয়ে আছে ৷
- নিপাহ ভাইৰাছ
এইবাৰ নিপাহ ভাইৰাছে পুনৰবাৰ মানুহৰ চিন্তা বৃদ্ধি কৰিলে ৷ কেৰালাত এই ভাইৰাছ ধৰা পৰাৰ পিছতে সৃষ্টি হৈছিল তীব্ৰ চাঞ্চল্যৰ ৷ নিপাহ এবিধ মাৰাত্মক ভাইৰাছ, জীৱ-জন্তু হৈছে এই ভাইৰাছৰ মুখ্য উৎস ৷ বিশেষজ্ঞসকলৰ মতে, এই ভাইৰাছ বাদুলিৰ জৰিয়তে মানুহলৈ বিয়পে ৷ এই ভাইৰাছ গাহৰি, কুকুৰ, মেকুৰী, ঘোঁৰা আৰু ভেড়াৰ পৰাও বিয়পিব পাৰে ৷ আনহাতে, এই ভাইৰাছৰ দ্বাৰা সংক্ৰমিত ব্যক্তিৰ সংস্পৰ্শলৈ আহিলেও নিপাহ ভাইৰাছ বিয়পে ৷ এই ভাইৰাছৰ আবিৰ্ভাৱৰ পিছৰে পৰা ইয়াৰ সন্দৰ্ভত সতৰ্কতা বৃদ্ধি পালে ৷
- ৰেবিজ
এই বছৰ ৰেবিজ বা জলাতংক ৰোগেও শিৰোনাম দখল কৰিছিল ৷ দৰাচলতে গাজিয়াবাদত কুকুৰে কামোৰাৰ ফলত জলাতংক ৰোগত শিশুৰ মৃত্যুৱে সকলোকে জোকাৰি গৈছিল ৷ এই শিশুটি কুকুৰে কামোৰাৰ পিছত ৰেবিজ নামৰ ৰোগত আক্ৰান্ত হৈছিল, তাৰ পিছত তেওঁৰ মৃত্যু হৈছিল ৷ ই এক ভাইৰেল সংক্ৰমণ, যি সংক্ৰমিত প্ৰাণীৰ কামোৰৰ ফলত বিয়পে ৷ লগতে সময়মতে চিকিৎসা নকৰিলে ই মাৰাত্মক প্ৰমাণিত হ’ব পাৰে ৷
- নিউমোনিয়া
শেহতীয়াকৈ চীনকে ধৰি বিশ্বৰ বহু ঠাইত ৰহস্যজনক নিউমোনিয়াৰ ঘটনা ধাৰাবাহিকভাৱে প্ৰকাশ পাইছে ৷ কেৱল এয়াই নহয়, শেহতীয়াকৈ খোদ ভাৰততে ৱাকিং নিউমোনিয়াৰ ঘটনা পোহৰলৈ আহিছে ৷ যদিও ভাৰতত পোৱা এই নিউমোনিয়াৰ ঘটনা চীনত বিয়পি পৰা নিউমোনিয়াৰ সৈতে কোনো সম্পৰ্ক নাই যদিও এই ৰোগো কিছুদিনৰ পৰা বাতৰিৰ শিৰোনাম দখল কৰি আহিছে ৷
- মানসিক স্বাস্থ্যজনিত সমস্যা
যদিও ই কোনো পৰম্পৰাগত সংক্ৰামক ৰোগ নহয়, তথাপিও মানসিক স্বাস্থ্যই ক্ৰমান্বয়ে দৃষ্টি আকৰ্ষণ কৰিছে । মহামাৰীৰ প্ৰভাৱৰ বাবে মানসিক স্বাস্থ্যত বিৰূপ প্ৰভাৱ দেখা গৈছিল ৷ সেইবাবেই মানসিক স্বাস্থ্য সজাগতা, সজাগতা, সম্পদ, আৰু সহায়ক ব্যৱস্থাৰ ওপৰত অধিক গুৰুত্ব দিয়া হৈছে ।
- হৃদৰোগ
২০২৩ চনত হৃদৰোগীৰ সংখ্যা বৃদ্ধিৰ পৰিপ্ৰেক্ষিতত কেন্দ্ৰীয় স্বাস্থ্যমন্ত্ৰী মানসুখ মাণ্ডব্য়ই সকলোকে সকীয়াই দি সাৱধানতা অৱলম্বন কৰিবলৈ পৰামৰ্শ আগবঢ়াইছে । আইচিএমআৰৰ গৱেষণাৰ পৰা জানিব পৰা গৈছে যে Covid-19ৰ পৰা সুস্থ হোৱা লোকৰ হাৰ্ট এটেকৰ সম্ভাৱনা বৃদ্ধি পাইছে । এনে লোকে নিজৰ হৃদয়ৰ বিশেষ যত্ন লোৱাটো প্ৰয়োজন ।
- মাংকি পক্স
চলি থকা Corona সংক্ৰমণৰ মাজতে এইবাৰ মাংকি পক্সৰ আশংকাও দেখা গ’ল । সাধাৰণতে আফ্ৰিকাৰ বনাঞ্চলত বিয়পি পৰা এই সংক্ৰমণৰ প্ৰভাৱ এই বছৰ বিশ্বৰ বহু দেশত দেখা গ’ল । ইউৰোপৰ দেশসমূহৰ লগতে ভাৰততো এই ৰোগৰ ঘটনাৰ তথ্য পোৱা গৈছিল । ১৪ জুলাইত ভাৰতত এই সংক্ৰমণৰ প্ৰথমজন ৰোগী কেৰালাত ধৰা পৰে । বিশ্বজুৰি সংক্ৰমণ বৃদ্ধিৰ প্ৰতি লক্ষ্য ৰাখি ২৩ জুলাইত বিশ্ব স্বাস্থ্য সংস্থাই ইয়াক স্বাস্থ্য জৰুৰীকালীন অৱস্থা বুলি ঘোষণা কৰে । বৰ্তমান ভাৰতত মাংকি পক্সৰ সংক্ৰমণ নিয়ন্ত্ৰণ কৰা হৈছে ।
- টমেটো ফ্লু
২০২৩ চনত শিশুৰ ক্ষেত্ৰত টমেটো ফ্লুৰ ঘটনা দেখা গৈছিল, যাৰ ফলত স্বাস্থ্য বিভাগ যথেষ্ট চিন্তিত হৈ পৰিছিল । কেৱল ২০২৩ চনতে নহয়, ২০২৪ চনতো মানুহে ইয়াৰ প্ৰতি বিশেষ যত্ন ল’ব লাগিব কাৰণ ই এক সংক্ৰামক ৰোগ, যিটো আক্ৰান্ত ব্যক্তিৰ সংস্পৰ্শলৈ আহিলে হ’ব পাৰে । ইয়াৰ প্ৰতিৰোধৰ বাবে বিশেষ সাৱধানতা অৱলম্বন কৰাটো জৰুৰী ।
লগতে পঢ়ক: শীতকালত কোভিড ৰোগীৰ সংখ্যা বৃদ্ধি পোৱাৰ আঁৰৰ কাৰণ কি ? নিজকে কেনেকৈ ৰক্ষা কৰিব
