ওদালগুৰি,15 ডিচেম্বৰঃ নাগৰিকত্ব সংশোধনী আইন বিৰোধী আন্দোলনত মহানগৰীত মৃত্যুবৰণ কৰে ঈশ্বৰ নায়ক(25) নামৰ যুৱকজনে ৷ গুৱাহাটীৰ ডাউন টাউনত নিৰাপত্তাৰক্ষীৰ বৰ্বৰ গুলীচালনাত আহত হোৱা নায়কে শনিবাৰে চিকিৎসাধীন অৱস্থাত মৃত্যুক আঁকোৱালি লয় ৷ মৃত যুৱকজনৰ ঘৰ ওদালগুৰি জিলাৰ হৰিশিঙা থানাৰ অন্তৰ্গত মাজুলী চাহ বাগিছাত ৷ উল্লেখ্য যে, ঈশ্বৰ নায়ক গুৱাহাটী চিকিৎসা মহাবিদ্যালয় হাস্পতালৰ আই চি ইউত চিকিৎসাধীন হৈ আছিল ৷ দেওবাৰে নিশা নায়কৰ নশ্বৰদেহ বাসগৃহলৈ অনাৰ পিছতে শোকাকুল পৰিৱেশে বিৰাজ কৰে ৷ ইপিনে যুৱকজনৰ মৃতদেহত টংলা আঞ্চলিক ছাত্ৰ সন্থা,অসম জাতীয়তাবাদী যুৱ ছাত্ৰ পৰিষদৰ লগতে বিভিন্ন জাতীয় দল-সংগঠনে শ্ৰদ্ধাঞ্জলি জ্ঞাপন কৰে ৷ লগতে আছুই মৃত যুৱকজনক শ্বহীদ ঘোষণা কৰে ৷
তদুপৰি টংলা চাৰিআলিত কৃষক মুক্তি সংগ্ৰাম সমিতি,অসম সাহিত্য সভাৰ সদস্যসকলে শ্বহীদজনক শ্ৰদ্ধাঞ্জলী জনায় ৷ ইয়াৰ পিছত সহস্ৰাধিক লোকে টংলাৰ পৰা মাজুলী চাহ বাগিছালৈ শ্বহীদজনৰ মৃতদেহ সমদল কৰি লৈ যায় । সমদলটোত আছু,যু্ৱ ছাত্ৰ পৰিষদ,আদিবাসী ছাত্ৰ সন্থা,চাহ জনগোষ্ঠী ছাত্ৰ সন্থাৰ লগতে বহুকেইটা জাতীয় দল-সংগঠনে অংশ গ্ৰহণ কৰে। এক শোকাকুল পৰিৱেশৰ মাজত মাজুলী চাহ বাগিছাত শ্বহীদজনক ৰাজহুৱা শ্ৰদ্ধাঞ্জলি জনোৱা হয় ৷ শ্ৰদ্ধাঞ্জলীৰ অন্তত ৰাইজৰ সহযোগত শ্বহীদজনৰ শেষকৃত্য সম্পন্ন কৰা হয় ৷
উল্লেখ্য যে, টংলা মহাবিদ্যালয়ৰ প্ৰাক্তন ছাত্ৰ ঈশ্বৰ নায়কে আৰ্থিক অসুবিধাৰ বাবে আধাতে অধ্যয়ন সমাপ্ত কৰি এবছৰপূৰ্বে মহানগৰীলৈ কৰ্মৰ সন্ধানত গৈছিল । গুৱাহাটী মহানগৰীৰ এটা শ্বপিং মলত কৰ্মৰত আছিল নায়ক ।
লগতে চাওকঃঅসমবাসীৰ ৰুদ্ৰমুৰ্তি দেখি সুৰ সলালে অগপই
