ওদালগুৰি, 8 মে': অৰুণাচলত অসমৰ বাহনৰ পৰা জব্দ বৃহৎ পৰিমাণৰ ভাং ৷ ওদালগুৰিৰ ভৈৰৱকুণ্ডস্থিত এছএছবিৰ ৬১ নং বেটেলিয়ানে মঙলবাৰে এক অভিযান চলাই অৰুণাচলৰ পৰা ৫৪ কিলো ভাং জব্দ কৰাৰ লগতে AS01P-7381 নম্বৰৰ এখন চাৰি চকীয়া বাহন জব্দ কৰিবলৈ সক্ষম হয় ৷ খবৰ অনুসৰি, মঙলবাৰে এছ এছ বিয়ে এক বিশেষ সূত্ৰৰ ভিত্তিত অৰুণাচলত থকা ৯০০ চেইন বৰ্ডাৰ আউট পোষ্টক ঘটনা সন্দৰ্ভত সজাগ কৰে । কিছু সময়ৰ পাচতে ৭০০ নং বৰ্ডাৰ আউট পোষ্টৰ সমীপত এখন চাৰি চকীয়া বাহন পৰিতক্ত অৱস্থাত থকা খবৰ লাভ কৰে এছ এছ বিয়ে । খবৰ লাভ কৰাৰ পাচতে এছ এছ বিৰ ৯০০ চেইন আৰু ৭০০ চেইনৰ বৰ্ডাৰ আউট পোষ্টৰ দল দুটাই অসমৰ গাড়ীখন জব্দ কৰাৰ লগতে গাড়ীখনত থকা দুটা বেগত ভৰাই ৰখা ৫৪ কেজি ভাং জব্দ কৰিবলৈ সক্ষম হয় । আনহাতে, এছ এছ বিৰ দল দুটাই সমীপৰ জংঘল আৰু পথতো অভিযান চলাইছিল যদিও কোনো ব্যক্তিকে আটক কৰিব সক্ষম ন'হল । বৰ্তমান এছ এছ বিয়ে অনুসন্ধান কৰিবলৈ জব্দ কৰা ভাং খিনি অৰুণাচলৰ খালাকতাং আৰক্ষী থানাত গতাই দিয়ে বুলি জানিব দিয়ে
৷
