তিনিচুকীয়া,8 নৱেম্বৰঃ তিনিচুকীয়া জিলাত অবৈধ কাঠ,কয়লাৰ ৰমৰমীয়া বেহাৰ বাতৰি প্ৰকাশ পাই থকাৰ মাজতেই জিলাখনৰ কাকপথাৰস্থিত এটা ইটাভাটাত ২০ গাড়ীতকৈ অধিক অবৈধ কয়লা মজুত থকাৰ খবৰে অঞ্চলটোত চাঞ্চল্যৰ সৃষ্টি কৰিছে ৷ কাকপথাৰৰ চেলেংগুৰীত জনৈক সিং উপাধিৰ ইটাভাটাটোত চাৰিটাকৈ ঠাইত সৰ্বমুঠ প্ৰায় বিশ গাড়ী কয়লা মজুত কৰি ৰখা হৈছে ৷ বৰ্তমান তিনিচুকীয়া জিলাৰ মাৰ্ঘেৰিটাস্থিত উত্তৰ-পূব কয়লা ক্ষেত্ৰত কয়লা ৰপ্তানী বন্ধ থকাৰ পৰিপেক্ষিতত ক'ৰ পৰা ইমান বৃহৎ সংখ্যক কয়লা মজুত কৰিলে,সেইয়া এক ৰহস্যজনক বিষয় হৈ পৰিছে ৰাইজৰ বাবে ৷
জানিব পৰা অনুসৰি অৰুণাচল প্ৰদেশৰ চাংলাং জিলাৰ খাৰচাঙৰ পৰা উক্ত কয়লাখিনি অবৈধ ভাৱে আনিছিল লোকজনে ৷ অৰুণাচল প্ৰদেশৰ মহাদেৱপুৰ হৈ ডিৰাক গেটেদি কাকপথাৰ চহৰৰ মাজেদি ইমান বৃহৎ সংখ্যক চোৰাং কয়লা অহাৰ পিছতো স্থানীয় আৰক্ষী তথা জিলা প্ৰশাসনে কোনো ব্যৱস্থা গ্ৰহণ নকৰাৰ বিষয়টোৱেও ৰহস্যৰ সৃষ্টি কৰিছে ৷
ইফালে ইটা ভাটাটোত অবৈধ কয়লা মজুত থকা বিষয়টোত তীব্ৰ প্ৰতিক্ৰিয়া প্ৰকাশ কৰিছে অসম জাতীয়তাবাদী যুৱ-ছাত্ৰ পৰিষদৰ লগতে যুৱ কংগ্ৰেছে ৷ উক্ত বৃহৎ পৰিমাণৰ চোৰাং কয়লা ক'ৰ পৰা,কেতিয়া,কেনেকৈ আহিল,তাৰ ওপৰত এক উচ্চ পৰ্যায়ৰ তদন্ত দাবী কৰিছে সংগঠন দুটাই ৷ স্থানীয় আৰক্ষী তথা জিলা প্ৰশাসনে অতি সোনকালে অবৈধ কয়লাখিনি জব্দ কৰাৰ লগতে চোৰাং কয়লা সৰবৰাহ কৰা লোকসকলৰ ওপৰত বিহিত ব্যৱস্থা গ্ৰহণ কৰাৰ দাবী জনাইছে ৷
লগতে পঢ়কঃ
