তিনিচুকীয়া, 9 অক্টোবৰ : সদৌ অসম জীৱিকা সখী সন্থাৰ কৰ্মচাৰী সকলক চৰকাৰে দীৰ্ঘ দিনৰ পৰা প্ৰয়োজনীয় সুবিধা সমূহ প্ৰদান নকৰাৰ অভিযোগত শুকুৰবাৰে, তিনিচুকীয়াৰ জিলা উপায়ুক্তৰ কাৰ্যালয়ৰ সন্মুখত দুঘণ্টীয়া অৱস্থান ধৰ্মঘট কাৰ্যসূচী ৰূপায়ন কৰে সন্থাটোৱে ৷ শুকুৰবাৰে দিনৰ প্ৰায় 11 বজাত অনুষ্ঠিত হোৱা এই প্ৰতিবাদী কাৰ্যসূচীত উপস্থিত থাকে সন্থাটোৰ প্ৰায় শতাধিক কৰ্মকৰ্তা ৷
বেতন বৃদ্ধি কৰা, টি.এ, ডি.এ প্ৰদানৰ ব্যৱস্থা গ্ৰহণ কৰা, বিনামূলীয়া চিকিৎসা প্ৰদান কৰা আৰু গাঁও পঞ্চায়ত অনুসৰি জীৱিকা সখীক একোটাকৈ লেপটপ প্ৰদান কৰাকে ধৰি কেতবোৰ দাবীৰে তেওঁলোকে প্ৰতিবাদ সাব্যস্ত কৰে ৷ উল্লেখ্য যে, জীৱিকা সখী সন্থাৰ বিষয়ববীয়া সকলে মহিলা সৱলীকৰণৰ বাবে ২০১২ চনৰ অক্টোবৰ মাহৰ পৰা বৰ্তমানলৈকে কাম কৰি আহিছে ৷ যাৰ বিনিময়ত তেওঁলোকে আৰম্ভণিৰে পৰা লাভ কৰি অহা ন্যূনতম বেতনৰ পৰিমাণৰ বাবে তেওঁলোক যথেষ্ট অসুবিধাৰ সন্মুখীন হৈ আহিছে বুলি অভিযোগ উত্থাপন কৰে ৷
