তিনিচুকীয়া, ১ ছেপ্তেম্বৰ : তিনিচুকীয়াৰ আদিত্য নাৰ্ছিং হোমত মঙলবাৰে এগৰাকী গৰ্ভৱতী মহিলাৰ মৃত্যু হয় ৷ মৃত মহিলাগৰাকীৰ পৰিয়ালৰ লোকে চিকিৎসকৰ গাফিলতিৰ ফলত মৃত্যু হোৱা বুলি অভিযোগ উত্থাপন কৰে ৷ এই ঘটনাক কেন্দ্ৰ কৰি সমগ্ৰ জিলাখনত তীব্ৰ চাঞ্চল্যই বিৰাজ কৰে ৷
ইফালে উক্ত ঘটনাৰ সন্দৰ্ভত বৃহস্পতিবাৰে তিনিচুকীয়াৰ জিলা আয়ুক্ত স্বপ্নীল পালে এক দণ্ডাধীশ পৰ্যায়ৰ তদন্তৰ নিৰ্দেশ ঘোষণা কৰে । তিনিচুকীয়া নখৰাই গাঁৱৰ মিতালী দাস নামৰ এগৰাকী মহিলাৰ অস্ত্ৰোপচাৰৰ পাচত চিকিৎসকৰ গাফিলতি ফলতেই মৃত্যু হোৱাৰ অভিযোগ উত্থাপন কৰি পৰিয়ালৰ তৰফৰ পৰা উত্তপ্ত পৰিস্থিতিৰ সৃষ্টি কৰি তুলিছিল নাৰ্ছিং হোমৰ চৌহদত ৷ যি ঘটনাৰ পাচতে উত্তপ্ত হৈ পৰিছিল তিনিচুকীয়া ৷ আনকি তিনিচুকীয়াবাসীও শংকিত হৈ পৰিছিল ৷
জিলা আয়ুক্তগৰাকীয়ে সমগ্ৰ বিষয়টো চালিজাৰি চোৱাৰ পাচতেই তিনিচুকীয়াৰ ৰাজহ চক্ৰৰ সহকাৰী ৰাজহ চক্ৰ বিষয়া ডিম্পি ভট্টাচাৰ্যক জিলা আয়ুক্তই সমগ্ৰ ঘটনাৰ তদন্তৰ নিৰ্দেশ দিয়ে ৷ লগতে ১০ দিনৰ ভিতৰত সমগ্ৰ ঘটনাৰ প্ৰতিবেদন দাখিল কৰিবলৈ সময়সীমা নিৰ্ধাৰণ কৰি দিয়ে ৷ ১০ দিনৰ পাচত পোহৰলৈ আহিব প্ৰকৃত মিতালী দাসৰ মৃত্যুৰ কাৰণ ৷
উল্লেখযোগ্য যে, তিনিচুকীয়া অসামৰিক চিকিৎসালয়ত কৰ্মৰত চিকিৎসকসকলে দীৰ্ঘদিনৰ পৰা ব্যক্তিগত চিকিৎসালয়ত চিকিৎসা প্ৰদান কৰি অহাৰ লগতে নিজাভাৱে চেম্বাৰ খুলি চিকিৎসা সেৱা প্ৰদান কৰি আহিছে ৷ যাৰ বাবে তিনিচুকীয়া অসামৰিক চিকিৎসালয়ত সময় ক’ম দিয়াৰ লগতে পৰ্যাপ্ত চিকিৎসা প্ৰদান নকৰাৰ অভিযোগ উত্থাপন হৈ আহিছে ৷ গতিকে সমগ্ৰ বিষয়সমূহৰ উপৰতো উচিত তদন্ত কৰিবলৈ সংবাদ মাধ্যমৰ জৰিয়তে আহ্বান জনাইছে একাংশ ভুক্তভোগীয়ে ৷
লগতে পঢ়ক : Tense situation in Nursing Home:সন্তান জন্ম দিয়েই অচিন দেশলৈ গ’লগৈ মাতৃ; কিন্তু কাৰ ভুলৰ বাবে?
