ডুমডুমা, 31 অক্টোবৰ : ডুমডুমাত পানী মটৰ চুৰি কাৰ্য নামি পৰিছে মহিলা । চিচিটিভি কেমেৰাত বন্দী হৈছে চুৰি কাৰ্যৰ সমগ্ৰ দৃশ্য। যোৱা ২৭ অক্টোবৰ তাৰিখে ডুমডুমাৰ ইমৰাণ ইলেক্ট্ৰনিকছ নামৰ এখন দুকানৰ পৰা এটা পানী মটৰ চুৰি হোৱাৰ ঘটনা পোহৰলৈ আহিছিল । বস্তু ক্ৰয় কৰিবলৈ অহাৰ চলেৰে এগৰাকী মহিলাই চুৰি কৰি নিছিল এটা পানী মটৰ । কিন্তু দোকানখনৰ চিচিটিভি কেমেৰাত মহিলা গৰাকীৰ সমগ্ৰ কাৰ্য্য আবদ্ধ হৈ পৰিছিল ।
শনিবাৰে পুনৰ উক্ত মহিলাগৰাকী ডুমডুমা নগৰৰ বজাৰত টহল দি থকা সময়ত চুৰি কাৰ্য সংঘটিত হোৱা ইমৰান ইলেক্ট্ৰনিকছ দোকানৰ গৰাকী ইমৰান হুচেইনে মহিলা গৰাকীক কৰায়ত্ব কৰি দোকানলৈ লৈ আহে । পানী মটৰ চুৰিৰ লগত জড়িত মহিলাগৰাকীৰ ঘৰ কাকপথাৰ সৰুমেচাই গাওঁত বুলি জানিব পৰা গৈছে । অন্যহাতে,চিচিটিভি কেমেৰাত আবদ্ধ সমগ্ৰ ঘটনাৰাজীৰ কথা মহিলা গৰাকীয়ে অস্বীকাৰ কৰি কেৱল পানী মটৰৰ খালি বাকচখনহে লোৱা বুলি দাবী কৰিছে ।
লগতে পঢ়ক: মালিগাঁৱত ভুৱা বেংক বিষয়াক আৱদ্ধ কৰিলে ৰাইজে
