শদিয়া, 30 ডিচেম্বৰ : তিনিচুকীয়াৰ ডুমডুমাত বিগত কিছুদিনৰ পৰা সঘনাই মটৰ চাইকেল চুৰিৰ ঘটনা সংঘটিত হৈ থকাৰ বাতৰি পোহৰলৈ অহা পিছত বৃহস্পতিবাৰে সন্ধিয়া হাতে লোটে ধৰা পৰে এটা কুখ্যাত মটৰ চাইকেল চোৰ (Bike lifter arrested at Doom Dooma) | সন্ধিয়া প্ৰায় 5.30 বজাত হাঁহচৰাৰ যুৱক পিন্টা বাউৰিৰ নিজ ঘৰৰ দুৱাৰমুখত ৰখাই থোৱা AS 06 V 7584 নম্বৰৰ ৰয়েল এনফিল্ড মটৰ চাইকেলখন চুৰি কৰি পলাবলৈ লওতেই স্থানীয় একাংশ যুৱকে চোৰটোক হাতে লোটে ধৰিবলৈ সক্ষম হয় ৷
চোৰটোৱে পলাবলৈ চেষ্টা কৰি স্থানীয় এগৰাকী যুৱকক চোকা অস্ত্ৰৰে আক্ৰমণ কৰে(Bike lifter attacks public) ৷ স্থানীয় লোকৰ ভাষ্য অনুসৰি এখন মটৰচাইকেলত তিনিটা চোৰ আহিছিল যদিও দুটা চোৰ পলাই যাবলৈ সক্ষম হয় ৷ স্থানীয় লোকে কৰায়ত্ব কৰা চোৰটো তিনিচুকীয়া জিলাৰ বৰগুৰিৰ জানুমুখৰ নিবাসী নিপুঞ্জয় দুৱৰা বুলি জানিব পৰা গৈছে ৷
উল্লেখ্য যে, মটৰ চাইকেল চোৰটোক কৰায়ত্ব কৰি আৰক্ষীক চমজাই দিয়াৰ পিছত ডুমডুমা থানাৰ লগতে কেইবাখনো থানাত যুৱকজনৰ বিৰুদ্ধে মটৰ চাইকেল চুৰি, গাড়ী চুৰি আৰু ডকাইতিৰ কেইবাটাও গোচৰ ৰুজু হৈ থকাৰ তথ্য পোহৰলৈ আহে ৷
লগতে পঢ়ক: সৰিয়হৰ ডুলিতে ভূত : ড্ৰাগছ ব্যৱসায়ৰ সৈতে জড়িত গৃহৰক্ষী জোৱান
