তেজপুৰ, 29 জুন : অসমীয়া স্বাভিমানৰ প্ৰতীক থলুৱা গামোচা বিক্ৰীৰে স্বাৱলম্বিতাৰ বাট চতিয়া সমষ্টিৰ একাংশ মহিলাৰ ৷ কন্যকা বোৱা কটা সমবায় সমিতিৰ জৰিয়তে তাঁতশালত ৰচিছে সপোন ৷ লক্ষ্য আগন্তুক পাঁচ বছৰত থলুৱা গামোচাৰে অসমৰ গামোচাৰ বজাৰ দখল কৰা ৷ চতিয়া সমষ্টিৰ বিধায়ক পদ্ম হাজৰিকাৰ একক প্ৰচেষ্টাত বিগত বৰ্ষত জামুগুৰিহাটৰ মাৰ্কেটিং চছাইটিৰ চৌহদত গঢ়লৈ উঠা কন্যকা বোৱা কটা সমবায় সমিতিয়ে ইতিমধ্যে অসমৰ বজাৰলৈ মুকলি কৰি দিছে পঞ্চাশ হাজাৰ থলুৱা গামোচা ৷
সমবায়টোৰ পৰিচালিকা ৰাজশ্ৰী বৰা আৰু অলংকাৰীক পৰিচালিকা লুণা বৰুৱাই জনোৱা তথ্য অনুসৰি,বৰ্তমান সমবায়খনত এশখনৰো অধিক মাইনাও আৰু উইভিং শালত সমষ্টিটোৰ কুৰিৰো অধিক গাঁৱৰ শতাধিক মহিলা জড়িত হৈ আছে ৷ একোখন শালত ফুল নাথাকিলে ছয়খন আৰু ফুল থাকিলে দিনে তিনিখনকৈ গামোচা উৎপাদন কৰা হয় ৷ কন্যকাৰ এই গামোচা সমূহ গুৱাহাটী,লখিমপুৰ,মংগলদৈ,ৰঙিয়া,নগাঁও,মৰিগাঁও বিশ্বনাথ,শোণিতপুৰকে ধৰি ৰাজ্যৰ ভিন্ন প্ৰান্তলৈ বিক্ৰীৰ বাবে প্ৰেৰণ কৰা হয় ৷
সমষ্টিটোৰ গঞা মহিলাসকলক বোৱা-কটাৰ উন্নত প্ৰশিক্ষণ প্ৰদান কৰি এই কন্যকা সমবায় সমিতিত শিপিনী হিচাপে জড়িতকৰণৰ থলুৱা গামোচাসমূহ বিক্ৰী কৰি মহিলাসকলে যথেষ্টভাৱে উপকৃত হোৱাৰ লগতে স্বাৱলম্বিতাৰ পথ বিচাৰি পাইছে তেওঁলোকে ৷ ইপিনে গামোচাৰ উপৰিও তাঁতশাল সমূহত বৰ্তমানে চেলেং,চাদৰ,মেখেলাকে ধৰি ভিন্ন জনজাতীয় সাজপাৰ উৎপাদনো কৰে মহিলাসকলে ৷ এনেদৰেই এতিয়া বিধায়ক পদ্ম হাজৰিকাৰ প্ৰচেষ্টাত মহিলাসকলে বিচাৰি পাইছে উপাৰ্জনৰ পথ ৷
