ৰঙাপৰাত বিপদসংকুল যাতায়ত

স্থানীয় প্ৰতিনিধি, চৰকাৰ তথা প্ৰশাসনৰ চৰম অৱহেলাৰ বাবে ৰঙাপৰাৰ মোলান গাঁৱৰ ৰাইজ তথা ছাত্ৰ ছাত্ৰীসকলে বিপদ সংকুলভাবে যাতায়ত কৰিবলৈ বাধ্য হৈছে ।

শোণিতপুৰ. 28 আগষ্ট : শোণিতপুৰ জিলাৰ ৰঙাপৰা বিধানসভা সমষ্টিৰ অন্তৰ্গত তথা উদমাৰী গাঁও পঞ্চায়তৰ অধীনস্থ মোলান গাঁৱৰ ৰাইজে চৰকাৰৰ চৰম অৱহেলাৰ বাবে বিপদসংকুলভাবে যাতায়ত কৰিবলগীয়া হৈছে ৷ পাহাৰীয়া খৰস্ৰোতা জৰাসৰ নদীখনৰ বাঢ়নি পানীয়ে মোলানগাঁও-ৰঙাপৰা সংযোগী পথত থকা একমাত্ৰ কাঠৰ দলংখন উটুৱাই নিয়াৰ পাচৰে পৰা বৰ্তমানলৈ চাৰিখন গাঁৱৰ ৰাইজ আৰু ছাত্ৰ-ছাত্ৰীয়ে যাতায়তৰ ক্ষেত্ৰত চৰম যন্ত্ৰণা ভুগিবলগীয়া হৈছে ৷

চৰকাৰৰ সদিচ্ছাৰ অভাৱৰ বাবে ৰাইজে যাতায়তৰ সুবিধাৰ্থে প্ৰত্যেক বছৰে খৰালিত গাঁঠিৰ ধন ভাঙি আৰু শ্ৰমদান কৰি বাঁহৰ দলং নিৰ্মাণ কৰি লয় যদিও বাৰিষাত নদীখনৰ বাঢ়নী পানীয়ে বাঁহৰ দলংখন উটুৱাই নিয়ে । তদুপৰি নদীখনৰ ওপৰেদি বাঁহৰ দলঙখনেৰে যাতায়ত কৰাটো অতি বিপদসংকুল ৷ জৰাসৰ নদীৰ ওপৰত পকী দলং নিৰ্মাণ কৰিবলৈ স্থানীয় জনপ্ৰতিনিধিক গাঁওখনৰ ৰাইজে বাৰম্বাৰ দাবী জনাই অহাৰ পাছতো জনপ্ৰতিনিধিগৰাকীয়ে নিষ্কিয় ভূমিকা গ্ৰহণ কৰি আহিছে ৷