তেজপুৰ, ৩১ জুলাই: আজি নটসূৰ্যৰ ৫৩ সংখ্যক স্মৃতি দিৱস । সমগ্ৰ ৰাজ্যৰ লগতে জন্মস্থান তেজপুৰত বৰ্ণাঢ্য কাৰ্যসূচীৰে পালন কৰা হৈছে মহান শিল্পীগৰাকীৰ স্মৃতি দিৱস । অসমৰ সাংস্কৃতিক জগতৰ ত্ৰিমূৰ্তিৰ অন্যতম নাটসূৰ্য ফণী শৰ্মাৰ আজি অর্থাৎ ৩১ জুলাইৰ মৃত্যু দিনটোত নটসূৰ্যৰ স্মৃতি দিৱস হিচাপে পালন কৰি অহা হৈছে ।
সোমবাৰে শোণিতপুৰ জিলা প্ৰশাসনে তেজপুৰ জ্যোতি ভাৰতীত স্মৃতিচাৰণ অনুষ্ঠিত কৰে । শোণিতপুৰ জিলাৰ আয়ুক্ত আৰু তেজপুৰৰ বিধায়ক তথা কলাগুৰুৰ জেষ্ঠ পুত্ৰ পৃথ্বিৰাজ ৰাভাৰ উপস্থিতিত স্মৃতিচাৰণ কৰা হয় । নটসূৰ্যৰ সমাধিস্থলীত জিলা প্ৰশাসনে আয়োজন কৰা শ্ৰদ্ধাঞ্জলি অনুষ্ঠানত আয়ুক্ত দেৱ কুমাৰ মিশ্ৰ,নটসূৰ্যৰ পৰিয়ালৰ লোকসকলৰ উপস্থিতিত এই মহান শিল্পী গৰাকীৰ স্মৃতিত শ্ৰদ্ধাঞ্জলি জনোৱা হয় । উল্লেখযোগ্য যে তেজপুৰ বাণ থিয়েটাৰত স্মৃতিচাৰণ আৰু নাট সমাৰোহৰ আয়োজন কৰিছে ।
১৯১০ চনত তেজপুৰ কলিবাৰীত মোলান শৰ্মাৰ ঔৰসত আৰু হোমেশ্বৰী দেৱীৰ গৰ্ভত জন্ম গ্ৰহণ কৰা ফণী শৰ্মাই তেজপুৰ চৰকাৰী বালক হাইস্কুলত অষ্টম শ্ৰেণীত পঢ়ি থাকোতেই "জয়মতী" নাটকত গদাপাণিৰ চৰিত্ৰত অভিনয় কৰি ৰূপৰ পদক অৰ্জন কৰিছিল । পিছত ১৯২১ চনত তেজপুৰীয়া দৰ্শকৰ সন্মুখত লাচিত বৰফুকনৰ চৰিত ৰূপায়ন কৰি দৰ্শকৰ ভূয়সী প্ৰশংসা লাভ কৰিবলৈ সক্ষম হয় । মাত্ৰ ১৮ বছৰ বয়সতে তেজপুৰ ঐতিহাসিক 'বাণ'ৰ মঞ্চত ৰাণা প্ৰতাপ আৰু বৃদ্ধ আকবৰৰ চৰিত্ৰত অভিনয় কৰা ফণী শৰ্মাই তেওঁৰ জীৱন কালত অলেখ নাট আৰু চলচ্চিত্ৰত অভিনয় কৰি সুখ্যাতি অৰ্জন কৰে ।
