নলবাৰী,20 মাৰ্চ: নলবাৰী বিধানসভা সমষ্টিৰ বিজেপি প্ৰাৰ্থীয়ে এইবাৰ ব্যতিক্ৰমী ধৰণেৰে ওচৰ চাপিবলৈ চেষ্টা কৰিছে ভোটাৰ ৰাইজৰ ৷ সমষ্টিটোৰ চুকে-কোণে ভ্ৰাম্যমাণ পুতলা নাচ প্ৰদৰ্শনেৰে আৰম্ভ কৰিছে বিজেপিৰ নিৰ্বাচনী প্ৰচাৰ ৷ শুকুৰবাৰে নিশা নলবাৰীৰ ঘগ্ৰাপাৰত নিৰ্বাচনী কাৰ্যালয় মুকলি কৰি পুতলা নাচৰ জৰিয়তে বিজেপি প্ৰাৰ্থী জয়ন্ত মল্ল বৰুৱাই চলালে নিৰ্বাচনী প্ৰচাৰ ৷ নিৰ্বাচনী প্ৰচাৰ সভাত পুতলা নাচ চাবলৈ গোট খালে ৰাইজ ৷ সমৰ্থকৰ মাজতো দেখা গ’ল আনন্দ ৷ অকল পুতলা নাচে নহয় ৷ ভোটাৰক আকৰ্ষণ কৰিবলৈ জয়ন্ত মল্ল বৰুৱাক সংগ প্ৰদান কৰিলে অভিনেত্ৰী প্ৰাঞ্জনা দত্তই ৷ নিজকে নলবৰীয়া বুলি চিনাকি দি অভিনেত্ৰী প্ৰাঞ্জনা দত্তয়েও ভোটাৰৰ ওচৰত নলবাৰী সমষ্টিৰ বিজেপি প্ৰাৰ্থী জয়ন্ত মল্ল বৰুৱাৰ হৈ ভোট ভিক্ষা কৰে ৷
উক্ত অনুষ্ঠানতে জয়ন্ত মল্ল বৰুৱাৰ উপস্থিতিত কেবাগৰাকীও আন দলৰ কৰ্মীয়ে যোগ দিয়ে বিজেপিত ৷ এই সভাতে বিজেপি প্ৰাৰ্থী জয়ন্ত মল্ল বৰুৱাই কংগ্ৰেছ-আজমলক ইতিকিং কৰিবলৈও নাপাহৰিলে ৷ আক্ৰমণ কৰিবলৈ নাপাহৰিলে নৱগঠিত আঞ্চলিক শক্তি এজেপি আৰু ৰাইজৰ দলক ৷ চান্দা পাৰ্টি এতিয়া ৰাজনীতিত বুলি কৈ জয়ন্ত মল্ল বৰুৱাই আছু আৰু এজেপিক তীব্ৰ কটাক্ষ কৰে ৷ পিছে বিজেপি প্ৰাৰ্থী জয়ন্ত মল্ল বৰুৱাৰ পুতলা নাচৰ জৰিয়তে চলোৱা নিৰ্বাচনী প্ৰচাৰে ভোটাৰক কিমান আকৰ্ষণ কৰিব পাৰে সেয়া নিৰ্বাচনী ফলাফলেহে প্ৰমাণ কৰিব ৷
লগতে পঢ়ক : সোমবাৰে অসমলৈ আহিব নিৰ্বাচন আয়োগৰ দল
