চমু পথেৰে সফল হোৱাৰ আশা পৰিত্যাগ কৰক ছাত্ৰ-ছাত্ৰীয়ে: সৰ্বানন্দ সোণোৱাল

বৰভাগ মহাবিদ্যালয়ৰ সোণালী জয়ন্তী অনুষ্ঠানৰ সতীৰ্থ সন্মিলনত অংশ লোৱাৰ উদ্দেশ্যে শনিবাৰে দুপৰীয়া প্ৰায় দুই বজাত নলবাৰীত উপস্থিত হয় মুখ্যমন্ত্ৰীগৰাকী ৷ নিজৰ ভাষণত মুখ্যমন্ত্ৰীগৰাকীয়ে কয় যে,অসমে আজি বহু পৰিৱৰ্তনৰ মুখ দেখিছে ৷ অসমত উৎপাদিত সামগ্ৰী হংকং,চীন আৰু লণ্ডনত বিক্ৰী হৈছে ৷ এইয়া পৰিৱৰ্তনৰে এটা অংশ ৷

নলবাৰী, চেপ্টেম্বৰ 14 : শনিবাৰে নলবাৰীত উপস্থিত হয় ৰাজ্যৰ মুখ্যমন্ত্ৰী সৰ্বানন্দ সোণোৱাল ৷ বৰভাগ মহাবিদ্যালয়ৰ সোণালী জয়ন্তী অনুষ্ঠানৰ সতীৰ্থ সন্মিলনত অংশ লোৱাৰ উদ্দেশ্যে দুপৰীয়া প্ৰায় দুই বজাত নলবাৰীত উপস্থিত হয় মুখ্যমন্ত্ৰীগৰাকী ৷ নিজৰ ভাষণত মুখ্যমন্ত্ৰীগৰাকীয়ে কয় যে,অসমে আজি বহু পৰিৱৰ্তনৰ মুখ দেখিছে ৷ অসমত উৎপাদিত সামগ্ৰী হংকং,চীন আৰু লণ্ডনত বিক্ৰী হৈছে ৷ এইয়া পৰিৱৰ্তনৰে এটা অংশ ৷ হিমা দাস,ৰীমা দাস বিশ্ব পৰ্যায়ত জিলিকি উঠাও পৰিৱৰ্তনৰে স্বৰূপ বুলি কয় মুখ্যমন্ত্ৰীগৰাকীয়ে ৷

ইয়াৰ লগতে ভাষণৰ মাজত প্ৰধান মন্ত্ৰী মোডীক প্ৰশংসা কৰিবলৈ নাপাহৰিলে সৰ্বানন্দ সোণোৱালে ৷ তেখেতে কয় যে, নৰেন্দ্ৰ মোডী বৰ্তমান বিশ্বৰ আটাইতকৈ জনপ্ৰিয় ৰাজনীতিক ৷ দুৰ্নীতিৰ বিৰুদ্ধে ধাৰাবাহিকভাৱে পদক্ষেপ গ্ৰহণ কৰাৰ কথা উল্লেখ কৰি তেখেতে কয় যে, দুৰ্নীতি মুক্ত, প্ৰদূষণ মুক্ত আৰু সন্ত্ৰাস মুক্ত অসম গঢ়াৰ লক্ষ্যৰে চৰকাৰে কাম কৰি আহিছে ৷ ছাত্ৰ-ছাত্ৰীসকলক উদ্দেশ্যি চমু পথেৰে সফল হোৱাৰ আশা পৰিত্যাগ কৰিবলৈ আহ্বান জনাই মুখ্যমন্ত্ৰী সোণোৱালে ৷

আনহাতে,মানৱজাতিৰ বাবে অভিশাপ স্বৰূপ প্লাষ্টিক পৰিত্যাগ কৰিবলৈও সকলোকে আহ্বান জনাই মুখ্যমন্ত্ৰীগৰাকীয়ে ৷ ইয়াৰ লগতে মুখ্যমন্ত্ৰী সোণোৱালে স্বাধীনতা আন্দোলনৰ শ্বহীদ মুকুন্দ কাকতি আৰু পণ্ডিত ধীৰেশ্বৰ আচাৰ্যৰ সোঁৱৰণত চৰকাৰীভাৱে বিশেষ আঁচনি লোৱাৰ কথাও ঘোষণা কৰে ৷ উল্লেখ্য যে,শনিবাৰে নিশা সোণালী জয়ন্তী অনুষ্ঠানত সমৰ হাজৰিকা দেৱে সাংস্কৃতিক অনুষ্ঠান উদ্বোধন কৰাৰ লগতে গীত পৰিৱেশন কৰিব গীতালি কাকতিয়ে ৷ আনহাতে,দেওবাৰে অনুষ্ঠিত হ'ব লগীয়া মুকলি সভাত অংশ ল'ব আছুৰ উপদেষ্টা সমুজ্জল কুমাৰ ভট্টাচাৰ্যৰ লগতে বহু কেইগৰাকী বিশিষ্ট ব্যক্তিয়ে ৷ নিশালৈ নৱ প্ৰজন্মৰ হাৰ্ট থ্ৰৱ জুবিন গাৰ্গৰ সংগীতানুষ্ঠানেৰে অন্ত পৰিব সোণালী জয়ন্তী অনুষ্ঠানৰ ৷