নগাঁও, 10 নৱেম্বৰ : গুৱাহাটীৰ ৰাজকন্যা বৰুৱাৰ আখ্যান মাৰ-নৌযাওঁতেই এইবাৰ নগাঁৱত এখন তীব্ৰবেগী ট্ৰাকে সংঘটিত কৰিলে অনুৰূপ ঘটনা । নগাঁৱৰ বাইপাছত কিছুদিন ধৰি দৌৰাত্ম্য বৃদ্ধি পাইছে একাংশ ট্ৰাক চালকৰ । মঙলবাৰে মাজনিশা নগাঁৱৰ উৰিয়াগাঁও বাইপাছত সংঘটিত এক ভয়ংকৰ পথ দুর্ঘটনা ৷
এখন তীব্ৰবেগী ট্ৰাকৰ খুন্দাত দুজনকৈ যুৱকে প্ৰাণ হেৰুৱাবলগীয়া হয় । ঘটনাৰ বিৱৰণী অনুসৰি, মঙলবাৰে মাজনিশা নগাঁৱৰ পৰা উজনি অসম অভিমুখে বাইকেৰে গৈ আছিল দুজন যুৱক । উজনিমুৱা যাত্ৰাই আছিল যুৱক দুজনৰ শেষ যাত্ৰা ।
হাতীচুঙৰ মেধিচুকৰ ৰিংকু মেধি আৰু ভূপেন দাস নামৰ যুৱক দুজনে উজনলৈ অভিমুখে গৈ থকা অৱস্থাতে ভুল পথেৰে বিপৰীত দিশৰ পৰা অহা এখন তীব্ৰবেগী ট্ৰাকে মহতিয়াই নিয়ে । ট্ৰাকখনৰ খুন্দাত থিতাতে নিহত হয় ৰিংকু মেধি আৰু ভূপেন দাস ৷ আনকি ট্ৰাকখনৰ খুন্দাত ভাঙি চুৰমাৰ হৈ পৰে বাইকখন ।
আনহাতে, এই দুৰ্ঘটনা সংঘটিত হোৱাৰ খবৰ লাভ কৰিয়েই ঘটনাস্থলীত নগাঁৱৰ যান বাহন শাখাৰ আৰক্ষী উপস্থিত ট্ৰাকখন জব্দ কৰে ৷ কিন্তু দুৰ্ঘটনা সংঘটিত কৰিয়েই ট্ৰাক এৰি ঘটনাস্থলীৰ পৰা পলায়ন কৰে ট্ৰাক চালক । পৰৱৰ্তী সময়ত আৰক্ষীৰ লোক ঘটনাস্থলীত উপস্থিত হৈ যুৱক দুজনৰ মৃতদেহ উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰে ।
লগতে পঢ়ক : আৰক্ষীৰ হাতত লামডিং সংৰক্ষিত বনাঞ্চল ধ্বংসত জড়িত দালালৰ তথ্য
