নিউজ ডেস্ক, 6 ডিচেম্বৰ: হেজাৰ অসমীয়াৰ বিক্ষোভ প্ৰতিবাদক নস্যাৎ কৰি লোকসভাত গৃহীত জাতিধ্বংসী অভিহিত কেব ৷ প্ৰতিবাদী ক্ষোভৰ বজ্ৰনিনাদেৰে অগ্নিগৰ্ভা অসম ৷ বন্ধ, ধৰ্মঘট আদিৰে তোলপাৰ ৰাজ্য ৷
নগাঁও: এনে সময়তে নগাঁৱত বিজেপি বিধায়ক ৰূপক শৰ্মাৰ বাসগৃহৰ সন্মুখত প্ৰতিবাদ কৰি আটকাধীন এন এছ ইউ আই কৰ্মী ৷ প্ৰতিবাদ কৰাৰ সময়তে আৰক্ষীৰ এটা বৃহৎ দলে আটক কৰি লৈ যায় কৰ্মীসকলক৷
ধেমাজি: ইফালে নেচ’ই আহ্বান কৰা বন্ধত স্তব্ধ হৈ পৰিছে ধেমাজি ৷ ৰাষ্ট্ৰীয় ঘাইপথৰ লগতে পুৱা ধেমাজিত বন্ধ সমৰ্থকে ৰে'লপথৰ ওপৰত টায়াৰ জ্বলাই অৱৰোধ কৰে ৰে'লপথ ৷ ফলত আবদ্ধ হৈ পৰে নামনিমুৱা মুৰ্কংচেলেক পেছেঞ্জাৰ ৰে'ল ৷
টিংখাঙ: আনফালে টিংখাঙত সৰ্বানন্দ সোনোৱাল,হিমন্ত বিশ্ব শৰ্মা আৰু অতুল বৰাৰ প্ৰতিমূৰ্তিক শাৰী,মেখেলা,পেটিকোট পিন্ধাই ৰাজপথত চোঁচৰালে প্ৰতিবাদী মহিলাই ৷ কেব তথা বিজেপি বিৰোধী শ্লোগানেৰে উত্তাল হ'ল টিংখাঙৰ মৰাণ-নাহৰকটীয়া সংযোগী ৰাজ্যিক ঘাইপথ ৷
যোৰহাট: শ্বহীদ দিৱসৰ প্ৰাকক্ষণত কেব বিৰোধিতাৰে নেচ’ই আহ্বান জনোৱা বন্ধৰ প্ৰভাৱ বাৰুকৈয়ে পৰিছে যোৰহাট জিলাত ৷ যোৰহাটত সকলো ব্যৱসায়িক প্ৰতিষ্ঠানৰ লগতে বন্ধ হোৱা পৰিলক্ষিত হৈছে কাৰ্যালয়সমূহো ৷ যোৰহাট জিলা উপায়ুক্ত কাৰ্যালয়ৰ সন্মুখত টায়াৰ জ্বলাই ব্যাপক প্ৰতিবাদী কাৰ্যসূচী ৰূপায়ণ একাংশৰ ৷
দৰং: বন্ধৰ প্ৰভাৱ সৰ্বত্ৰে পৰিলক্ষিত হয় দৰং জিলাতো ৷ জিলা খনৰ ছিপাঝাৰ,খাৰুপেটীয়া,দলগাঁও,কলাইগাঁও আদি অঞ্চলত ৰাজপথত টায়াৰ জ্বলাই প্ৰতিবাদ সাব্যস্ত কৰিলে একাংশ প্ৰতিবাদকাৰীয়ে ৷
কলগাছিয়া: কলগাছিয়াৰ বিভিন্ন স্থানত ৰাইজে ৰাজ্যিক ঘাইপথৰ ওপৰত অৱস্থান প্ৰতিবাদ কৰি উত্তাল কৰি তোলে চৌদিশ ৷ কলগাছিয়াৰ লাংলা কলেজৰ সমীপতো প্ৰতিবাদকাৰী সকলে পথত টায়াৰ জ্বলাই কেব বিৰোধী প্ৰতিবাদ সাব্যস্ত কৰাৰ লগতে সৰ্বানন্দ সোণোৱাল,হিমন্ত বিশ্ব শৰ্মা আৰু অতুল বৰাৰ প্ৰতিকৃতি দাহ কৰে ।
লগতে পঢ়ক: ৰাজপথত অসম বিশ্ববিদ্যালয়ৰ ছাত্ৰ সমাজৰ 'বজ্ৰকল্প' কাৰ্যসূচী
