কলিয়াবৰ,2 মাৰ্চ: হেঁপাহৰ ৰঙালী বিহুলৈ মাজত মাথো ডেৰ মাহ বাকী ৷ বিহু বুলিলেই প্ৰথম সকলোৰে বাবে প্ৰয়োজন হয় জাতিটোৰ সন্মান স্বৰূপ একোখন গামোচা । কিন্তু ক্ৰমাৎ যেন কমি আহিছে থলুৱা শিপিনীৰ দ্বাৰা প্ৰস্তুত হোৱা গামোচাৰ প্ৰচলন ৷ যাৰ ফলত মেচিনত নিৰ্মাণ হোৱা আবেগবিহীন একোখন গামোচাই লাহে লাহে দখল কৰিছে অসমৰ বজাৰ ৷ কিন্তু জাতিটোৰ বাবে অশনি সংকেত স্বৰূপ এই সমস্যাৰ অন্ত পেলোৱাৰ উদ্দেশ্যে কলিয়াবৰৰ আছুৱে ২০১৭ চনত আৰম্ভ কৰিছিল থলুৱা গামোচা উৎপাদনৰ এক আঁচনি । অসমীয়াৰ জাতিৰ সন্মান বিজড়িত গামোচাৰ থলুৱা উৎপাদনৰ লক্ষ্যৰে সম্প্ৰতি বিশেষ পদক্ষেপ গ্ৰহণ কলিয়াবৰ ছাত্ৰ সন্থাৰ ৷
উল্লেখযোগ্য যে, ২০১৭ চনত আছুৰ উপদেষ্টা সমুজ্জল ভট্টাচাৰ্য আৰু বিশিষ্ট অভিনেত্ৰী চেতনা দাসৰ উপস্থিতিত কলিয়াবৰৰ নিজ চিলাবন্ধাক 'শিপিনী গাঁও'ৰূপে স্বীকৃতি প্ৰদান কৰা হৈছিল । সোমবাৰে আছুৰ বহু কেইজন কৰ্মকৰ্তা তথা স্থানীয় গণ্য-মান্য ব্যক্তিৰ উপস্থিতিত উদ্বোধন কৰা হয় এইবৰ্ষৰ থলুৱা গামোচাৰ উৎপাদন কাৰ্য । উক্ত অনুষ্ঠানতে নিজ চিলাবন্ধা শিপিনী গাঁৱৰ 100 গৰাকী থলুৱা শিপিনীক গামোচা উৎপাদনৰ বাবে সূতাৰ যোগান ধৰে কলিয়াবৰ কেন্দ্ৰীয় ছাত্ৰ সন্থাই ।
একেদৰে, বিগত বৰ্ষসমূহৰ দৰেই এইবাৰো সমাগত ৰঙালী বিহুলৈ 1000 খনৰো অধিক থলুৱা গামোচা উৎপাদনৰ লক্ষ্য লৈছে এইসকল শিপিনীয়ে ৷ যাৰ বাবে ছাত্ৰ সন্থাই সূতাৰ যোগান ধৰাৰ লগতে এটি থলুৱা গামোচা বিক্ৰী কেন্দ্ৰ জৰিয়তে বজাৰত উপলব্ধ কৰিব থলুৱা গামোচাসমূহ ৷ তদুপৰি অসমীয়া থলুৱা শিপিনীসকলক উচিত মূল্য দি তেওঁলোকৰ বাবে বিশেষ পদক্ষেপ লোৱাৰ বাবে চৰকাৰলৈ অনুৰোধ জনাইছে কলিয়াবৰ ছাত্ৰ সন্থাই ।
লগতে পঢ়কঃ বিজেপি-অগপৰ আসন বুজাবুজি ৯৫ শতাংশ সম্পূৰ্ণ : হিমন্ত বিশ্ব
