নগাঁও ,19 মে': নগাঁও জিলাৰ বটদ্ৰৱাৰ নিকটৱৰ্তী বাংঠাই গাঁৱৰ প্ৰতিভাৱান শৰীৰ চৰ্চাবিদ তথা মঞ্চ অভিনেতা আৰু যুৱ কংগ্ৰেছৰ নিষ্ঠাবান কৰ্মী প্ৰাণজিৎ ৰাজবংশীৰ শুকুৰবাৰে নিশা গুৱাহাটীৰ এক ব্যক্তিগত খণ্ডৰ চিকিৎসালয়ত মৃত্যু হয় ৷ মৃত্যুৰ সময়ত তেওঁৰ বয়স আছিল 36 বছৰ ৷
অভিনেতা প্ৰাণজিৎ ৰাজবংশীৰ অকাল মৃত্যু বাংঠাই গাঁৱৰ নিৱাসী তথা অসম আৰক্ষীৰ প্ৰাক্তন জোৱান হৰেশ্বৰ ৰাজবংশীৰ কনিষ্ঠ পুত্ৰ প্ৰাণজিৎ বিগত এমাহ ধৰি যকৃতজনিত ৰোগত ভুগি চিকিৎসাধীন হৈ আছিল ৷ পাঁচদিন পূৰ্বে তেখেতৰ স্বাস্থ্যৰ অধিক অৱনতি ঘটাত পৰিয়ালৰ লোকে গুৱাহাটীৰ গণেশগুৰিস্থিত পলিক্লিনিকৰ আই.চি. ইউত ভৰ্তি কৰায় যদিও চিকিৎসাধীন অৱস্থাতে শুকুৰবাৰে নিশা মৃত্যুক সাৱটি লয় প্ৰাণজিতে ৷ উল্লেখ্য যে,এজন প্ৰতিভাৱান শৰীৰচৰ্চাবিদ হিচাপে নগাঁও জিলাত বিশেষভাৱে পৰিচিত আছিল প্ৰাণজিৎ ৰাজবংশী ৷ ইয়াৰোপৰিও তেখেতে 2005 চনত 'জুনিয়ৰ মিষ্টাৰ নগাঁও' খিতাপ অৰ্জন কৰিছিল ৷ লগতে 'মিষ্টাৰ মাজুলী'কে ধৰি ৰাজ্যৰ আগশাৰীৰ বিভিন্ন দেহশ্ৰী প্ৰতিযোগিতাত অংশ লৈ বিশেষ সুনাম কঢ়িয়াই আনিছিল প্ৰাণজিতে ৷ একেদৰে এজন সু-নিপুণ মঞ্চ অভিনেতা হিচাপেও বৃহত্তৰ বটদ্ৰৱা সমষ্টিত পৰিচিত আছিল তেওঁ । নগাঁও- মৰিগাঁও জিলাৰ বিভিন্ন মঞ্চত নিজৰ সাৱলীল অভিনয়েৰে দৰ্শকৰ হৃদয় জিনিবলৈ সক্ষম হৈছিল প্ৰাণজিতে । অভিনয় আৰু ক্ৰীড়াৰ সমান্তৰালভাৱে যুৱ কংগ্ৰেছৰ এজন সক্ৰিয় কৰ্মীৰূপে কৰ্ম সম্পাদন কৰি গৈছিল প্ৰাণজিতে ৷ ইপিনে শনিবাৰে তেখেতৰ নশ্বৰ দেহ বাংঠাই গাঁৱৰ বাসগৃহলৈ অনাৰ পিচত গাঁওবাসীৰ লগতে অনেক শুভাকাংক্ষী উপস্থিত হৈ শেষ শ্ৰদ্ধা নিৱেদন কৰে ৷ মৃত্যুৰ সময়ত তেখেতে পিতৃ, এগৰাকী 6 বছৰীয়া কন্যা, 5 মহীয়া পুত্ৰ সন্তান, পত্নী , জেষ্ঠ ভাতৃকে ধৰি অনেক ইষ্ট- কুটুম্বক ইহসংসাৰত এৰি থৈ যায় ৷ তেখেতৰ আকস্মিক বিয়োগত বেবেজীয়া প্ৰেছ ক্লাৱ , বটদ্ৰৱা প্ৰছ ক্লাৱ , সামাজিক অনুষ্ঠান সুহৃদকে, ধৰি বিভিন্ন অনুষ্ঠান-প্ৰতিষ্ঠানে শোক প্ৰকাশ কৰিছে ৷
