নগাঁও, 1 মে’ : ৰাজ্যত অপৰাধীৰ বিৰুদ্ধে অব্যাহত আছে এনকাউন্টাৰ ঘটনা (Encounter in Assam) । পুনৰবাৰ গৰজিল অসম আৰক্ষীৰ আগ্নেয়াস্ত্ৰ ৷ এইবাৰ গুলীচালনাৰ ঘটনাৰ স্থান নগাঁৱৰ ৰূপহীহাট (Encounter in Nagaon)।
দেওবাৰে নিশা আৰক্ষীৰ গুলীত গুৰুতৰভাৱে আহত হৈছে এটা দুধৰ্ষ ড্ৰাগছ মাফিয়া । আৰক্ষীৰ গুলীত আহত হোৱা ড্ৰাগছ মাফিয়াটোৰ নাম ৰমিজুল ইছলাম বুলি জানিব পৰা গৈছে (Police shoot most wanted suspected drug mafia in Nagaon) । জানিব পৰা মতে, দীৰ্ঘদিনৰ পৰা ড্ৰাগছ সৰবৰাহৰ সৈতে জড়িত আছিল অভিযুক্ত ৰমিজুল ইছলাম ।
তথ্য অনুসৰি, দেওবাৰে ৰূপহীহাট আৰক্ষীয়ে ড্ৰাগছ সৰবৰাহ কৰা সন্দৰ্ভত গোপন সূত্ৰৰ আধাৰত লাভ কৰিছিল এক খবৰ ৷ এই খবৰৰ আধাৰতে ৰূপহীহাট আৰক্ষীয়ে ৰূপহীহাটৰ বৰতলত চলায় এক অভিযান ৷ এই অভিযানতে ৰূপহীহাট আৰক্ষীয়ে বৰতলৰ পৰা ড্ৰাগছ মাফিয়া ৰমিজুল ইছলামক আটক কৰে । লগতে অভিযুক্ত ৰমিজুল ইছলামৰ পৰা 75 টা ড্ৰাগছ ভৰ্তি কন্টেনাৰো জব্দ কৰিবলৈ সক্ষম হয় ৷
লগতে পঢ়ক : Kokrajhar KLO news: পুনৰ মূৰ দাঙি উঠিছে নেকি কে এল অ’ৱে ?
ইফালে আৰক্ষীয়ে ৰমিজুলক আটক কৰি থানালৈ নি থকাৰ অৱস্থাতে আৰক্ষীৰ চকুত ধূলি দি পলায়ন কৰাৰ চেষ্টা কৰে ৷ তেনেতে উপায়ন্তৰ হৈ অভিযুক্ত ড্ৰাগছ মাফিয়াটোলৈ লক্ষ্য কৰি আৰক্ষীয়ে গুলী কৰিবলৈ বাধ্য হয় ৷ ফলত আৰক্ষীৰ গুলীত আহত হয় ৰমিজুল ইছলাম ।
জানিব পৰা মতে, ৰমিজুলৰ ভৰিত লাগে আৰক্ষীৰ গুলী ৷ তাৰ পাচতে গুলীবিদ্ধ অভিযুক্ত ড্ৰাগছ মাফিয়া ৰমিজুল ইছলামক সোমবাৰে পুৱতি নিশা নগাঁৱৰ পৰা তেজপুৰ টাইমচ হাস্পতাললৈ প্ৰেৰণ কৰা হয় । অৱশ্যে এই বাতৰি যুগুত কৰা পৰলৈকে নগাঁও আৰক্ষীয়ে এই সন্দৰ্ভত প্ৰকাশ কৰা নাই কোনো মন্তব্য । উল্লেখ্য যে, অভিযুক্ত ড্ৰাগছ মাফিয়া ৰমিজুল ইছলামৰ ঘৰ নাঙলদোৱাত বুলি জানিব পৰা গৈছে ৷
লগতে পঢ়ক : KLO cadre neutralized: কোকৰাঝাৰ এনকাউণ্টাৰত নিহত দুই KLO ৰ সদস্য
