নগাঁও, 16 মে;: মহামাৰী কৰ'ণা ভাইৰাছে সৃষ্টি কৰা ত্ৰাসৰ পৰা ৰক্ষা পাবলৈ দেশজুৰি পৰিষ্কাৰ পতিচ্ছন্নতাৰ ওপৰত বিশেষ গুৰুত্ব দিয়াৰ সময়তে নগাওঁ পৌৰসভাৰ বিৰুদ্ধে উত্থাপন হৈছে গুৰুতৰ অভিযোগ । বিভিন্ন স্থানত পৌৰসভাই ৰাজপথ পৰিষ্কাৰ কৰাৰ লগতে চেনিটাইজা কৰাত ব্যস্ত থকাৰ সময়তে নগাঁও পৌৰসভাৰ বিৰুদ্ধে উত্থাপন হৈছে পৰিবেশ দুৰ্গন্ধময় কৰাৰ গুৰুতৰ অভিযোগ ৷
উল্লেখ্য যে, কৰ'ণা সৃষ্ট আতংকময় পৰিবেশৰ মাজতে ৰাজ্যত শ শ গাহৰি ছোৱাইন ফেভাৰত আক্ৰান্ত হোৱাৰ বাবে নগাঁৱত বৃদ্ধি পাইছে গাহৰিৰ মৃত্যুৰ সংখ্যা ৷ বিগত প্ৰায় এসপ্তাহত 15 টাতকৈও অধিক গাহৰিৰ মৃত্যু হৈছে নগাওঁ চহৰৰ মেতুৰ পট্টিত ৷ উক্ত মৃত গাহৰিক লৈ নগাঁও পৌৰসভাই নিকৃষ্ট কাণ্ড সংঘটিত কৰাৰ অভিযোগ ৰাইজৰ ৷ অভিযোগ অনুসৰি নগাঁৱৰ ঠাকুৰ ৰামকৃষ্ণ ৰোডৰ হৰিজন কলনিত পথৰ দাঁতিতে পৌৰসভাই পুতিলে মৃত গাহৰি ৷
জনবসতিপূৰ্ণ এলেকাৰ ৰাজপথৰ দাঁতিতে এনেদৰে মৃত গাহৰি পোতাৰ অভিযোগ উত্থাপন কৰিছে স্থানীয় ৰাইজে । যাৰ বাবে এতিয়া উৎকট দুৰ্গন্ধৰ মাজেৰে দিন অতিবাহিত কৰিবলগীয়া হৈছে অঞ্চলটোৰ বাসিন্দাই ৷
লগতে পঢ়কঃ শোণিতপুৰৰ মিছামাৰীত চৰকাৰী সাহায্য বিতৰণত ব্যাপক দুৰ্নীতিৰ অভিযোগ
