নগাঁও,৬ মে': ৰাজ্যত কৰ'ণাই ভয়াৱহ ৰূপ ধাৰণ কৰাৰ সময়তে শিক্ষা বিভাগে বিদ্যালয়,মহাবিদ্যালয় তথা চৰকাৰী-বেচৰকাৰী সকলো প্ৰতিষ্ঠান, হোষ্টেল আদি বন্ধৰ ঘোষণা কৰিছে । ইয়াৰ পিছতে সকলো জিলাৰে প্ৰশাসনৰ লোকসকল সষ্টম হোৱা দেখা গৈছে ।
নগাঁও জিলা উপায়ুক্ত তথা জিলা দুৰ্যোগ ব্যৱস্থাপনা প্ৰাধিকৰণৰ অধ্যক্ষ, কবিতা পদ্মনাভনে চৰকাৰী আৰু বেচৰকাৰী সকলো ধৰণৰ শিক্ষানুষ্ঠান বন্ধৰ ঘোষণা কৰিছে । ক’ভিডৰ প্ৰাদুৰ্ভাৱ ৰোধ কৰিবলৈ সতৰ্কতামূলক ব্যৱস্থা হিচাপে ঘোষণা কৰা এই নিৰ্দেশনা অনুসৰি পৰৱৰ্তী নিৰ্দেশ নিদিয়া পৰ্যন্ত জিলাখনত প্ৰাক্ প্ৰাথমিকৰ পৰা বিশ্ববিদ্যালয় পৰ্যন্ত সকলো শিক্ষানুষ্ঠান বন্ধ থাকিব । অৱশ্যে ছাত্ৰ-ছাত্ৰীসকলৰ বাবে অনলাইন শিক্ষাৰ ব্যৱস্থা কৰিবলৈ নিৰ্দেশ দিয়া হৈছে ।
