মৰিগাঁও, 10 মেঃ অসম লোকসেৱা আয়োগৰ দ্বাৰা অনুষ্ঠিত পৰীক্ষাত ধনৰ বিনিময়ত কৃষি বিষয়াৰ পদ হস্তগত কৰা চিৰাঙৰ কৃষি উন্নয়ন বিষয়া মৃগেন হালৈক বৃহস্পতিবাৰে মৰিগাঁৱত গ্ৰেপ্তাৰ কৰা হয় ৷ ভঙাগড় থানাত চলি থকা ১৫৯/১৭ নং গোচৰ মৰ্মে টকা দি চাকৰি লোৱাৰ অভিযোগত চিৰাঙৰ জিলাৰ কৃষি উন্নয়ন বিষয়াগৰাকীক আটক কৰে ৷
গোচৰটোৰ তদন্তকাৰী বিষয়া শুভাশীষ বৰুৱাই বৃহস্পতিবাৰে নিশা মৰিগাঁৱতে কৃষি বিষয়াগৰাকীক ব্যাপক জেৰা কৰে ৷ উল্লেখ্য যে, সমগ্ৰ প্ৰক্ৰিয়াটোৰ জৰিয়তে ২৩ জনৰো অধিক কৃষি বিষয়াই এনেদৰে ধনৰ বিনিময়ত চাকৰি লোৱাৰ অভিযোগ উত্থাপিত হৈছে৷ সেইমৰ্মে মৃগেন হালৈক তদন্তকাৰী বিষয়াই মৰিগাঁৱত সোধাপোচ কৰাৰ অন্তত বিষয়াগৰাকীক কৰায়ত্ত কৰে ৷
ইতিমধ্যে মৃগেন হালৈক গুৱাহাটীৰ বিশেষ আদালতত হাজিৰ কৰিবলৈ অনা হৈছে ৷ আৰক্ষীয়ে বিষয়াগৰাকীক আৰু অধিক তদন্তৰ বাবে সাত দিনৰ জিম্মাত বিচাৰিব বুলি সাংবাদিকক জনায় ৷ আনহাতে ধনৰ বিনিময়ত চাকৰি লোৱাৰ অভিযোগত আৰু কেইবাজনো কৃষিবিষয়া গ্ৰেপ্তাৰ হোৱাৰ সম্ভাৱনা থকাৰ কথা জানিব পৰা গৈছে ৷
