Jorhat Majuli bridge update: মাজুলীলৈ দলং নিৰ্মাণৰ কাম লেহেমীয়া হোৱাক লৈ ক্ষোভিত মন্ত্ৰী অজন্তা নেওগ

বহু প্ৰত্যাশিত যোৰহাট-মাজুলী সংযোগী দলঙৰ নিৰ্মাণস্থলীত উপস্থিত হ’লগৈ বিত্তমন্ত্ৰী অজন্তা নেওগ ৷ দলং নিৰ্মাণৰ কামৰ অগ্ৰগতিৰ খতিয়ানক লৈ খঙত অগ্নিশৰ্মা হৈ পৰে মন্ত্ৰীগৰাকী ৷ কেন্দ্ৰীয় মন্ত্ৰী নিতিন গাডকাৰীক দলং নিৰ্মাণৰ কামত লেহেমীয়া হোৱাৰ অভিযোগ উত্থাপনৰ কথা সদৰী কৰে মন্ত্ৰীগৰাকীয়ে (Ajanta Neog Visits Jorhat Majuli bridge site) ৷

মাজুলী, ২৮ মাৰ্চ: মাজুলীলৈ এখন দলং হ’ব, ফেৰীৰে বিপদসংকুল যাতায়াত কৰা দিনবোৰৰ অন্ত পৰিব ৷ এই সপোন দেখিছিল মাজুলীবাসীয়ে ৷ কিয়নো দুবাৰকৈ আধাৰশিলা স্থাপন কৰা দলংখন অতিসোনকালেই নিৰ্মাণ সম্পূৰ্ণ হৈ উঠিব বুলি আশা কৰা হৈছিল ৷ কিন্তু ইটোৰ পিচত সিটো বিসংগতিয়ে লগ নেৰা হৈছে যোৰহাট-মাজুলী সংযোগী দলঙক (Jorhat Majuli bridge update) ৷ মঙলবাৰে দলং নিৰ্মান থলীত বিত্তমন্ত্ৰী অজন্তা নেওগ উপস্থিত হৈ খঙত অগ্নিশৰ্মা হৈ পৰে (Finance Minister Ajanta Neog in Majuli) ৷ দুবছৰত দলংখনৰ মাত্ৰ 7 শতাংশ কামহে সমাপন হৈছে বুলি কৈ ঠিকাদাৰৰ লগতে দলং নিৰ্মাণৰ দায়িত্বত থকা প্ৰতিষ্ঠানটোৰ লোকক ধমক দিয়ে মন্ত্ৰীগৰাকীয়ে (Minister Ajanta Neog anger) ৷

তেওঁ কয়, "এই দলংখনলৈ কেৱল মাজুলীবাসীয়েই নহয় সমগ্ৰ অসমে অপেক্ষা কৰি আছে ৷ কি পদ্ধতি অনলম্বন কৰিলে দলংখনৰ কাম সোনকালে শেষ কৰিব পৰা হ’ব সেই কথা মই মুখ্যমন্ত্ৰী ডাঙৰীয়াক অৱগত কৰিম (Ajanta Neog Visits Jorhat Majuli bridge) ৷ কামবোৰ খৰতকীয়া হ’ব লাগে ৷ অসমত এতিয়া বাৰিষা আহিব, গতিকে বাৰিষাৰ পূৰ্বেই তেওঁলোকে সকলো ধৰণৰ সা-সুবিধা অৱলম্বন কৰিব লাগে ৷’’

মন্ত্ৰীগৰাকীয়ে লগতে কয়, ‘‘ইয়াৰ পূৰ্বেও মই দলং নিৰ্মাণ প্ৰতিষ্ঠানৰ লগত বৈঠকত মিলিত হৈছো, কিন্তু ইয়াৰ পিচতো এইটো গতিত কাম চলি আছে, পৰৱৰ্তী সময়ত মই নিজেই নিতিন গাডকাৰীক লগ ধৰি দলংখনৰ নিৰ্মাণৰ অগ্ৰগতিৰ বিষয়ে জনামগৈ ৷ দলঙৰ কাম অতিকৈ লেহেমীয়া হৈছে ৷ দলং নিৰ্মাণৰ কামত হেমাহি কৰিছে নিৰ্মাণ প্ৰতিষ্ঠানে ৷’’

উল্লেখ্য যে, ২০২১ চনৰ ২৮ ফেব্ৰুৱাৰীত প্ৰধানমন্ত্ৰী নৰেন্দ্ৰ মোডীয়ে বহু প্ৰত্যাশিত মাজুলী আৰু যোৰহাট সংযোগী দলঙৰ আধাৰশিলা নিৰ্মাণ কৰিছিল ৷ ভাৰত চৰকাৰে ৯২৫ কোটি ৪৮ লাখ ব্যয় কৰি যোৰহাট-মাজুলী সংযোগী দলংখনৰ কাম হাতত লৈছে ৷ এই আৱন্টিত ধন ৰাশিৰ ৬৫০.৫৭ কোটি টকা ৰাজ্য চৰকাৰে মাজুলীৰ মূল দলংখনৰ নিৰ্মাণৰ কামত ব্যয় কৰিব ৷ এই দলঙৰ মূল দৈৰ্ঘ্য আৰু ইয়াৰ সমগ্ৰ পথ, সংযোগী পথকে ধৰি দলঙৰ মুঠ দৈৰ্ঘ্য ৮.২৫ কিলোমিটাৰ হ’ব ৷ আধাৰশিলা স্থাপনৰ প্ৰায় ৮ মাহৰ পিচত ২০২২ বৰ্ষৰ ২৯ নৱেম্বৰৰ পৰা মাজুলী দলঙৰ কাম আনুষ্ঠানিকভাৱে কৰা হয় ৷

ইফালে এতিয়া সমাগত বাৰিষা ৷ বাৰিষাত ফেনে ফুটুকাৰে বাঢ়ে ব্ৰহ্মপুত্ৰৰ বুকু ৷ বাৰীষাৰ পূৰ্বেই যদি নিৰ্মাণৰত প্ৰতিষ্ঠানটোৱে দলংখন নিৰ্মাণৰ বাবে উচিত ব্যৱস্থা নলয় তেনেহ’লে অনাগত দিনত দলং নিৰ্মাণৰ কাম আৰু লেহেমীয়া হ’ব বুলি মন্ত্ৰীগৰাকীয়ে সদৰী কৰে ৷ মন্ত্ৰীগৰাকীয়ে আৰু কয় যে, ইয়াত এক হাজাৰ কোটি টকীয়া দলং নিৰ্মাণ হৈ থকা যেন লগা নাই ৷

লগতে পঢ়ক: খুঁটা পোতোতেই মেলিছে ফাঁট; সুকলমে নিৰ্মাণ হ’বনে যোৰহাট-মাজুলী দলং !