লখিমপুৰ,১৮ আগষ্ট: লখিমপুৰত বিদ্যুৎ বিভাগৰ বিৰুদ্ধে ছাত্র সন্থাৰ প্ৰতিবাদ । নগৰৰ মাজত জ্বলালে মন্ত্রী নন্দিতা গাৰ্লোচাৰ পুত্তলিকা । অনিয়মীয়া বিদ্যুৎ যোগানৰ বিৰুদ্ধে শুকুৰবাৰে লখিমপুৰত একাধিক সংগঠনে বিভাগটোৰ বিৰুদ্ধে সাব্যস্ত কৰে তীব্ৰ প্ৰতিবাদ । আন সংগঠনৰ লগতে উত্তৰ লখিমপুৰ আঞ্চলিক ছাত্র সন্থায়ো নগৰৰ মাজত লখিমী চাৰিআলিত শক্তি মন্ত্রী নন্দিতা গাৰ্লোচাৰ পুত্তলিকা দাহ কৰি প্ৰতিবাদ সাব্যস্ত কৰে ।
শক্তি মন্ত্রী কাম নাই, বিদ্যুৎ বিভাগ হায় হায়, শক্তি মন্ত্রী হুচিয়াৰ আদি শ্লোগান দি ছাত্র সন্থাই বিভাগীয় মন্ত্রী নন্দিতা গাৰ্লোচাৰ পুত্তলিকা দাহ কৰে । প্ৰতিবাদস্থলীত প্ৰতিবাদকাৰী সকলে তীব্র ক্ষোভ প্রকাশ কৰি কয় যে, ৰ'দ দিলেও বিদ্যুৎ নাথাকে, বৰষুণ দিলেও বিদ্যুৎ নাথাকে । বিভাগটো পৰিচালনা কৰাত ব্যৰ্থ হৈছে অকৰ্মন্য শক্তি মন্ত্রী নন্দিতা গাৰ্লোচা ।
সঘনাই বিদ্যুৎ কৰ্তন কৰি এইহেন গৰমত বিভাগটোৱে ৰাইজৰ জ্বলাকলা খুৱাইছে ৷ এফালে মাচুল বৃদ্ধি কৰি ৰাইজক টেটুচেপা দিয়া বিভাগটোৱে আনফালে সঘনাই বিদ্যুৎ কৰ্তন কৰি ৰাইজক নাকনি-কাণনি কৰিছে ৷ শক্তি মন্ত্রীগৰাকী নামতহে আছে কামত নাই বুলি ক্ষোভ উজাৰে প্ৰতিবাদকাৰীসকলে । লগতে কোনো গ্ৰাহকৰ দুহেজাৰ টকা বিল হলেই সংযোগ কৰ্তন কৰাত সিদ্ধাহস্ত বিভাগটোৱে কিন্তু বিদ্যুৎ যোগান নিয়মীয়া কৰাত একোৱেই নকৰাৰো অভিযোগ উত্থাপন কৰে ।
