লখিমপুৰ, ১২ আগষ্ট : স্বাধীনতা দিৱসৰ পূৰ্বে অকাল মৃত্যুক সাৱটি ল’লে অসম আৰক্ষীত কৰ্মৰত জোৱান কুকিল দত্তই ৷ আগন্তুক স্বাধীনতা দিৱসৰ কাৰ্যসূচীত অংশগ্ৰহণৰ উদ্দেশ্যৰে গুৱাহাটীৰ খানাপাৰাৰ পশু চিকিৎসা মহাবিদ্যালয়ৰ খেলপথাৰত অনুষ্ঠিত হৈ থকা পেৰেড অনুশীলনত ব্যস্ত আছিল কুকিল দত্ত ৷ কিন্তু অতি ৰহস্যজনকভাৱে পেৰেড অনুশীলনৰ মাজতেই মৃত্যুৰ হয় অসম আৰক্ষীৰ অনাতাঁৰ সংগঠনত কৰ্মৰত জোৱান কুকিল দত্তৰ ৷
![Assam Police personnel dies during practice for I-day in Guwahati](https://etvbharatimages.akamaized.net/etvbharat/prod-images/12-08-2023/as-lakhimpur-12aug-01-vislbytpix-suddendeathaproconstable-jibangoswami-10046_12082023111316_1208f_1691818996_129.jpg)
তাৰ পাচত কুকিলৰ ঘৰৰ মানুহে লাভ কৰিলে কুকিলৰ মৃত্যুৰ খবৰ ৷ শাৰীৰিক অসুস্থতাৰ বাবেই হঠাৎ মৃত্যু হ’ল কুকিলৰ ৷ এই বাতৰি লাভ কৰাৰ পাচতে কুকিলৰ বাসগৃহত যেন সৰগহে ভাগি পৰিল ৷ ভাঙি গ’ল বহু সপোন ৷ হেৰাই গ’ল বহু আশা ৷
কিন্তু ইয়াৰ মাজতে উত্থাপন হৈছে বিভিন্ন প্ৰশ্নৰ ৷ স্থানীয় এজন লোকে উল্লেখ কৰা অনুসৰি, এটা সাধাৰণ পলিথিনেৰে মেৰিয়াই শনিবাৰে পুৱা আৰক্ষীয়ে কুকিলৰ নশ্বৰদেহ লখিমপুৰৰ গড়েহগা ঢেকিয়াল গাঁৱৰ স্ব-গৃহলৈ লৈ অনা হয় ৷ তাৰ পাচতে ৰাইজৰ অজ্ঞাতে কাহিলি পুৱাতেই অন্ত্যেষ্টিক্ৰিয়া সম্পন্ন কৰা হয় কুকিলৰ ।
কৰ্মৰত অৱস্থাত মৃত্যু হোৱাৰ পাচতো বিভাগীয় মৰ্যদা অবিহনেই পঞ্চভূতত বিলীন হ’ল কুকিলৰ শৱদেহ ৷ এই লৈ এতিয়া উদ্ৰেক হৈছে বিভিন্ন প্ৰশ্ন ৷ কিন্তু এই সন্দৰ্ভত নিমাত অসম আৰক্ষী ৷ উল্লেখ্য যে, শান্ত, অমায়িক স্বভাৱৰ ল’ৰা আছিল কুকিল ৷ সকলোৰে লগত হাঁহি মাতি থকা ল’ৰাটোৰ এই অকাল মৃত্যুৰ খবৰে এতিয়া শোকস্তব্ধ কৰি তুলিছে লখিমপুৰবাসীক ৷