লখিমপুৰ, ১২ মে': লখিমপুৰত চৰকাৰক হুংকাৰ দি ৰাইজৰ দলৰ সভাপতি তথা বিধায়ক অখিল গগৈয়ে কয়, যিকোনো মুহূৰ্ততে তীব্র ৰূপত গা কৰি উঠিব পাৰে বৃহৎ নদীবান্ধ বিৰোধী আন্দোলন (Anti big dam protest in Assam) । ধৰ্মীয় কানি খুৱাই, ৰাষ্ট্ৰসন্ত্ৰাস নমাই আনি চৰকাৰে আন্দোলনটো মষিমূৰ কৰিবলৈ চেষ্টা কৰিছে । কিন্তু ৰাইজৰ দলে এনে চৰকাৰৰ কৌশলৰ বিপৰীতে গৈ আন্দোলন আৰম্ভ কৰিব ।
লখিমপুৰত এক দলীয় যোগদান কাৰ্যসূচীত অংশ লৈ বিধায়ক অখিল গগৈয়ে বৃহৎ নদীবান্ধৰ প্ৰসংগত সংবাদমাধ্যমৰ আগত কয় যে, কেৱল নামনি-সোৱণশিৰি প্ৰকল্পই (Lower Subansiri Hydroelectric Power Project) নহয়। অৰুণাচলত স্থাপন কৰিব খোজা প্ৰতিটো নদীবান্ধৰে বিৰোধিতা কৰি যাব ৰাইজৰ দলে। বিধান সভাতো তেওঁ এই লৈ প্ৰতিবাদ কৰিব ৷ মুখ্যমন্ত্রী ড৹ হিমন্ত বিশ্ব শৰ্মাকো তেও ক্ষুৰধাৰ সমালোচনা কৰি কয়, হিমন্ত বিশ্ব শৰ্মাই কেতিয়াবা ৰাইজৰ দলত যোগদান কৰিলেও অখিল গগৈয়ে বিজেপিত যোগদান নকৰে ।
