কৰিমগঞ্জ, 8 ছেপ্তেম্বৰঃ একেটা পৰিয়ালৰে সাতজনকৈ সদস্য কোভিড-19ত আক্ৰান্ত হৈ চিকিৎসাধীন ৷ এনে সময়তেই মৃত্যু হয় বৃদ্ধ পিতৃৰ ৷ এই কৰুণ কাহিনী সংঘটিত হৈছে পাথাৰকান্দিৰ বৈঠাখাল অঞ্চলত ৷ বিগত 29 আগষ্ট তাৰিখে অঞ্চলটোৰ সেবক সিনহা নামৰ ব্যক্তিগৰাকী লগতে তেখেতৰ পৰিয়ালৰ সাতগৰাকীকৈ সদস্যৰ দেহত ধৰা পৰে কোভিড-19ৰ উপস্থিতি ৷ কেৱল তেখেতৰ পিতৃ,পত্নী আৰু এগৰাকী সদস্যৰ ফলাফল নিগেটিভ আহে ৷
পৰিয়ালৰ প্ৰায় আটাইকেইগৰাকী লোকে কোভিড-19ত আক্ৰান্ত হোৱাত স্বাস্থ্যৰ অধিক অৱনতি ঘটে ৰাধাকান্ত সিনহাৰ আৰু সোমবাৰে শেষ নিশ্বাস ত্যাগ কৰে ৷ এনে অৱস্থাত একমাত্ৰ বোৱাৰীৰ কাষত উপস্থিত হয় স্থানীয় লোক ৷ সৌভাগ্যক্ৰমে, পৰিয়ালটোৰ পুনৰ কোভিড-19ৰ পৰীক্ষা কৰাত আটাইৰে ফলাফল নিগেটিভ আহে ৷ ফলত সোমবাৰে নিশাই বাসগৃহত আহি উপস্থিত হয় সদস্যকেইজন ৷ ইয়াৰ পিছতেই স্থানীয় লোকৰ সহযোগত ৰাধাকান্ত সিনহাৰ মৃতদেহ সৎকাৰ কৰা হয় ৷
