ডিফু, ১৪ আগষ্ট : লাহে লাহে অসমৰ বিদ্ৰোহী সংগঠনসমূহ মূল সুঁতিলৈ ঘূৰি আহিবলৈ আৰম্ভ কৰিছে । শেহতীয়াকৈ কেইবাটাও সংগঠনৰ সদস্যই আত্মসমৰ্পণ কৰা দেখা গৈছে । কেৱল এয়াই নহয় মুখ্যমন্ত্ৰী ড৹ হিমন্ত বিশ্ব শৰ্মাই (Himanta Biswa Sarma) ঘোষণা কৰা মতে আলফা স্বাধীনেও (ULFA) অহা তিনি মাহলৈ যুদ্ধ বিৰতি সম্প্ৰসাৰণ কৰিছে ।
গতিকে এই খবৰে অসমৰ প্ৰতিগৰাকী নাগৰিককে আনন্দিত কৰিছে । ইয়াৰ মাজতে আন এক ভাল খবৰ । এইবাৰ মূল সুঁতিলৈ উভতিছে 'ইউনাইটেড পিপলছ ৰিভলিউচনৰী ফ্ৰণ্ট' চমুকৈ ইউপিআৰএফৰ (UPRF) কেইবাগৰাকী সদস্য ।
কাৰ্বি আংলঙৰ কুকি বিদ্ৰোহী সংগঠনটোৰ ২৭ গৰাকীকৈ সদস্যই এইবাৰ আত্মসমৰ্পণ কৰাৰ খবৰ আহিছে । সশস্ত্ৰ সংগ্ৰামৰ পথ ত্যাগ কৰি সদস্যকেইজনে ডিলাই থানাৰ অন্তৰ্গত ছাইজঙত আনুষ্ঠানিকভাৱে আত্মসমৰ্পণ কৰে ।
অনুষ্ঠানত উপস্থিত থাকে জিলাখনৰ আৰক্ষী অধীক্ষক পুষ্পৰাজ সিং সহ কেইবাগৰাকী শীৰ্ষ আৰক্ষী ৷ উগ্ৰপন্থীৰ সদস্যসকলে চাৰিটাকৈ অত্যাধুনিক ৰাইফল (Rifle), পাঁচটা পিষ্টল, কেইবাটাও পইণ্ট ২২ বন্দুকৰ লগতে অন্যান্য নথিপত্ৰসমূহ আৰক্ষীক হস্তান্তৰ কৰে ৷ বিদ্ৰোহী সংগঠনৰ কেডাৰৰ আত্মসমৰ্পণে এতিয়া কাৰ্বি আংলঙত ব্যাপক চৰ্চা লাভ কৰিছে ।
লগতে পঢ়ক :বঙাইগাঁও জিলাৰ অভয়াপুৰীত তুংগত স্বাধীনতা দিৱসৰ প্ৰস্তুতি
