টিংখাঙৰ যুৱকৰ বহিঃৰাজ্যত ৰহস্যজনক মৃত্যু

বহিঃৰাজ্যত ৰহস্যজনক ভাৱে টিংখাঙৰ যুৱকৰ মৃত্যু। কৰ্ম সংস্থাপনৰ উদ্দশ্যৰে বহিঃৰাজ্যলৈ গৈ উভতি আহিল যুৱকজনৰ ক্ষত-বিক্ষত মৃতদেহ ।

টিংখাং, 21 অক্টোবৰ: ডিব্ৰুগড়ৰ জিলাৰ টিংখাঙত সংঘটিত হৈছে এক হৃদয় বিদাৰক ঘটনা । বহিঃৰাজ্যত ৰহস্যজনক ভাৱে টিংখাঙৰ যুৱকৰ মৃত্যু। কৰ্ম সংস্থাপনৰ উদ্দেশ্যে কেইটামান দিনৰ পূৰ্বে বহিঃৰাজ্যলৈ ঢাপলি মেলিছিল যুৱকজন। কিন্তু ঘৰলৈ উভতি আহিল যুৱকজনৰ ক্ষত-বিক্ষত মৃতদেহ । 25 বছৰীয়া যুৱক জন টিংখাঙৰ ৰাজগড় ন-ভকতীয়াৰ লাৱণ্য কোচ আৰু স্বৰ্গীয় বিজয় কোচৰ সন্তান ৷ অৰূপ কোচ নামৰ যুৱকজন গোলাঘাটৰ সৰুপথাৰত এটা মাইক্ৰ ফাইনেন্স কোম্পানীত কৰ্মৰত আছিল। আত্মীয়ই জনোৱা মতে কিছুদিন পূৰ্বে কলকাতাৰ এটা ব্যক্তিগত কোম্পানীত কৰ্মৰত টিংখাঙৰ শান্তনু ধাদুমীয়া নামৰ বন্ধু এজনে অৰূপ কোচক কলকাতালৈ নিমন্ত্ৰণ জনাইছিল। উদ্দেশ্য আছিল অৰূপক এটা ভাল কৰ্ম-সংস্থাপন ব্যৱস্থা কৰি দিয়াৰ। বন্ধুৰ প্ৰস্তাৱ অনুসৰি টিংখাঙৰ আজিজবাগ অঞ্চলৰ সঞ্জয় দত্ত নামৰ এজন বন্ধুৰ সৈতে যোৱা ১২ অক্টোবৰত অৰূপ কোচ কলকাতালৈ ঢাপলি মেলিছিল ।

বন্ধুৰ আমন্ত্ৰণেই যেন কাল হ'ল অৰূপৰ বাবে। কলকাতাত গৈয়ে শান্তনুৰ ৰূমত থকা কলকাতাৰে দুজন যুৱকৰ পৰা যথেষ্ট অশান্তি পোৱা বুলি অৰূপে মাকক ফোনেৰে জানিবলৈ দিছিল। ৰহস্যজনক ভাৱে অৰূপ কোচে কলকাতাত অস্বাভাৱিক আচৰণ কৰিছিল বুলি জনাই পৰিয়ালৰ লোকে। হয়তো নিজৰ মৃত্যুৰ শংকা হৈছিল যুৱকজনৰ। ১৮ অক্টোবৰত ঘৰলৈ বুলি ৰে'লেৰে উভতি আহে যদিও দুৰ্ভগীয়া যুৱকজন ঘৰ গৈ নাপালে ৷ কিন্তু ঘৰ যোৱাৰ পূৰ্বে অৰূপ কোচে কলকাতাৰ বিকি সেন আৰু সঞ্জয় তেল নামৰ যুৱক দুজনৰ ওপৰত ব্যৱস্থা ল'বলৈ মাকলৈ ফোনৰ জৰিয়তে অৱগত কৰোৱাৰ লগতে এটা মেছেজ প্ৰেৰণ কৰি দুটাকৈ ম'বাইল নম্বৰ দিছিল। কিন্তু যুৱকজনৰ শংকা,আশংকাই সত্য প্ৰমাণিত হ'ল । অৱশেষত ঘৰলৈ আহি থকা মেধাৱী অৰূপ কোচৰ ক্ষত-বিক্ষত মৃতদেহ দেওবাৰে পশ্চিমবংগৰ নিউ-জলপাইগুৰিৰ ৰেল লাইনৰ কাষত উদ্ধাৰ হয় ।

সোমবাৰে বিয়লি অৰূপৰ মৃতদেহ ঘৰ আহি পোৱাৰ পাচতে এক শোকাকূল পৰিৱেশৰ সৃষ্টি হয়। কি পৰিস্থিতিত অৰূপ কোচ নামৰ যুৱকজনে অকাল মৃত্যুক সাৱটিব লগা হ'ল তাকে লৈ এতিয়া গভীৰ ৰহস্যৰ সৃষ্টি হৈছে । এইয়া পৰিকল্পিত হত্যাকাণ্ড নে আন কিবা সকলো আৰক্ষীৰ তদন্তৰ পিছতহে জানিব পৰা যাব ৷