ৰঙিয়া,4 মে'ঃ দেশত চলি থকা লক্ ডাউনৰ বাবে মোক্ষম আঘাত পৰিছে দেশৰ অৰ্থনীতিত ৷ ব্যক্তিগত প্ৰতিষ্ঠানত কাম কৰা বহু উচ্চ শিক্ষিত যুৱক-যুৱতীৰ উপাৰ্জনৰ পথ বন্ধ হৈ পৰিছে ৷ কিন্তু এই লক্ ডাউনৰ মাজতে অৰ্থ উপাৰ্জনৰ পথ বাচি উলিয়াইছে ৰঙিয়াৰ কেইজনমান উদ্যমী উচ্চ শিক্ষিত যুৱক-যুৱতীয়ে ৷ তেওঁলোকে লগলাগি আৰম্ভ কৰিছে এক নতুন ব্যৱসায় ৷
ৰঙিয়া অঞ্চলৰ নগৰিকক সামৰি ঘৰে ঘৰে গৈ ৰেষ্টুৰেণ্টৰ খাদ্য আৰু অত্যাৱশ্যকীয় সামগ্ৰী যোগান ধৰিছে এওঁলোকে। Food Deliveryনামেৰে ফেচবুক পেজ খুলি আৰু ফেচবুকৰ জৰিয়তে প্ৰচাৰৰ দ্বাৰা আৰম্ভ কৰিছে এই ব্যৱসায় । ফেচবুকৰ পেজত প্ৰচাৰ চলোৱাৰ পিছতে গ্ৰাহকৰ পৰা যথেষ্ট সঁহাৰি পোৱা পৰিলক্ষিত হৈছে । ফোন কৰি অথবা হোৱাটছ এপত মেছেজ কৰি খাদ্য বস্তু ঘৰত যোগান দিয়াৰ ব্যৱস্থা কৰিছে যুৱক-যুৱতী কেইজনে ।
কৰ'ণাৰ পৰা সতৰ্কতা অৱলম্বন কৰি সম্পূৰ্ণ চাফ-চিকুনকৈ খাদ্য প্ৰস্তুত কৰি গ্ৰাহকক যোগান ধৰাৰ বাবে গ্ৰাহক সকলেও উচ্চ শিক্ষিত যুৱক-যুৱতী কেইগৰাকীক প্ৰশংসা কৰিছে ।
