দক্ষিণ কামৰূপ,23 আগষ্টঃ আৰম্ভ হৈছে ভ্ৰাম্যমানৰ নাট্যযাত্ৰা ৷ ২০১৯-২০ বৰ্ষৰ বাবে এতিয়া সাজু হৈছে ভ্ৰাম্যমান থিয়েটাৰৰ দলসমূহ ৷ ২০১৯-২০ বৰ্ষৰ বাবে শুকুৰবাৰৰ পৰা সাজু হৈছে ৰাজতিলক থিয়েটাৰ। বৃহস্পতিবাৰে নিশা আনুষ্ঠানিকভাৱে বৰ্ষটোৰ বাবে নাট্যযাত্ৰাৰ শুভাৰম্ভণি ঘটিল ৰাজতিলক থিয়েটাৰৰ । মহানগৰীৰ খানামুখৰ লক্ষী মন্দিৰ প্ৰাংগণত অনুষ্ঠিত ৰাজতিলক থিয়েটাৰৰ পেণ্ডেলত নাট্যৰ আনুষ্ঠানিক শুভাৰম্ভণি অনুষ্ঠানত বন্তি প্ৰজ্বলন কৰে কামৰূপ মহানগৰ সাহিত্য সভাৰ সভাপতি মৃণালিনী দেৱীয়ে ৷ তাৰপিছতে জ্যেষ্ঠ অভিনেতা দীনেশ দাসে মঞ্চৰ ফিটা কাটি আনুষ্ঠানিকভাৱে মঞ্চ মুকলি কৰে ।
ৰাজতিলক থিয়েটাৰে এইবাৰ ধ্ৰুৱজ্যোতি শৰ্মাৰ 'অগ্নিসাক্ষী' আৰু অভিজিৎ ভট্টাচাৰ্যৰ 'চকুপানীৰ পুতলা' আৰু 'মানৱ ড্ৰাইভাৰৰ প্ৰেম' নামৰ ৩ খন নাট অসমবাসী ৰাইজক উপহাৰ দিব । প্ৰথমটো পেণ্ডেলৰ প্ৰথমটো দৰ্শনীতে ৰাইজৰ অভূতপূৰ্ব সঁহাৰি দেখি অভিভূত হৈ পৰে অভিনেতা-অভিনেত্ৰীসকল ৷এইবৰ্ষৰ নাটসমূহত অভিনয় কৰিছে ৰাগ ঐনিতম,জুপিতৰা ভূঞাকে ধৰি কেইবাগৰাকীও অভিনেতা-অভিনেত্ৰীয়ে ৷
