বাইহাটা, 10 জুলাই : কামৰূপ(গ্ৰাম্য) জিলাৰ কমলপুৰ ৰাজহ চক্ৰ বিষয়াৰ কাৰ্যালয়ত একাংশ মণ্ডলে দীৰ্ঘদিন ধৰি চৰম স্বৈৰচাৰিতা চলাই অহাৰ অভিযোগ উত্থাপন কৰিছে খোদ কমলপুৰ সমষ্টিৰ বিধায়ক দিগন্ত কলিতাই । সংবাদ মাধ্যমেৰে হোৱা এক বাৰ্তালাপত বিধায়ক গৰাকীয়ে কাৰ্যালয়টোৰ একাংশ মণ্ডলৰ বিৰুদ্ধে ক্ষোভ প্ৰকাশ কৰে । বিধায়ক দিগন্ত কলিতাই কয় যে, উক্ত কাৰ্যালয়টোৰ একাংশ লাট মণ্ডলে কম্পিউটাৰ চলাব নাজানে ৷
ফলত কাৰ্যালয়টোৰ একাংশ কম্পিউটাৰ জনা লোকক মণ্ডলৰ পাছৱৰ্ডকে ধৰি কাৰ্যালয়টোৰ বিভিন্ন নথি-পত্ৰ অৰ্পণ কৰিবলগীয়া হয় ৷ দীৰ্ঘদিনে এনেদৰেই কাৰ্যালয়টোৰ কাম-কাজ চলি থকা বুলি অভিযোগ কৰে বিধায়ক কলিতাই । এই সুবিধা লাভ কৰি কাৰ্যালয়টোৰ একাংশ দালালে ইচ্ছা অনুসৰি মণ্ডলসকলৰ হৈ কাম-কাজ চলাই নিয়ে ৷
ৰাইজে বিভিন্ন কামৰ বাবে কাৰ্যালয়টোলৈ আহে যদিও দালালৰ মইমতালিৰ ফলতে হাৰাশাস্তিৰ সন্মুখীন হ’বলগীয়া হয় ৷ উক্ত বিষয়ৰ অভিযোগ লাভৰ পিছতে বিধায়ক গৰাকীয়ে শুকুৰবাৰে কমলপুৰ ৰাজহ চক্ৰ বিষয়াৰ কাৰ্যালয়ত উপস্থিত হয় ৷ তদুপৰি বিষয় সন্দৰ্ভত চক্ৰ বিষয়াগৰাকীক সাক্ষাৎ কৰে ৷
উল্লেখ্য যে, কাৰ্যালয়টোৰ একাংশ কৰ্মচাৰীয়ে উৎকোচ লৈ ৰাইজক হাৰাশাস্তি কৰাৰ অভিযোগ উত্থাপিত হৈছে ৷ একাংশ লাট মণ্ডলে লোকসকলৰ ভূমি আনৰ নামত ক্ৰয়-বিক্ৰয়ৰ প্ৰমাণ পত্ৰ উৎকোচ গ্ৰহণ কৰি উলিয়াই দিয়ে বুলিও উঠিছে অভিযোগ ৷ স্থানীয় লোকে এনে অৰাজকতা সন্দৰ্ভত বিধায়ক দিগন্ত কলিতাক অভিযোগ উত্থাপন কৰে । এমাহৰ ভিতৰত যদিহে কাৰ্যালয়টোত চলি থকা এই অৰাজকতা দূৰ নহয়, তেন্তে বিধায়ক গৰাকীয়ে উপযুক্ত ব্যৱস্থা গ্ৰহণৰ হুংকাৰ প্ৰদান কৰে ।
লগতে পঢ়ক- দুদিনীয়া ভ্ৰমণসূচীৰে কোকৰাঝাৰত উপস্থিত মন্ত্ৰী পীযুষ হাজৰিকা
