ৰঙিয়া,17 জুন: লক-ডাউন আৰু সান্ধ্য আইনৰ সুযোগ গ্ৰহণ কৰি ৰাজ্যৰ ঠায়ে ঠায়ে বৃদ্ধি পাইছে চোৰৰ উপদ্ৰৱ ৷ এইবাৰ ৰঙিয়াৰ ঐতিহাসিক শ্মশান কালী মন্দিৰত ভক্তই এৰি দিয়া ছাগলী ভক্ষণৰ চেষ্টা চলালে চোৰৰ দলে ৷ 150 বছৰীয়া শ্মশান কালী মন্দিৰৰ চৌহদতে ভক্ষণৰ বাবে ছাগলী কাটিলে তিনিজনীয়া চোৰৰ দলে ৷ শতিকা পুৰণি মন্দিৰৰ চৌহদতে ছাগলী কাটি মাংস ভগাবলৈ লোৱাৰ সময়তে ৰাইজে হাতে-লোটে কৰায়ত্ত কৰিলে ৰুবুল দাস নামৰ এটা ছাগলী চোৰক ৷ স্থানীয় ৰাইজে লপা-থপা দি অৱশেষত ৰঙিয়া আৰক্ষীক গতাই দিয়ে ছাগলী চোৰ ৰুবুল দাসক ৷
উল্লেখ্য যে, শ্মশান কালী মন্দিৰৰ সমীপৰে ৰুবুল দাসৰ লগতে পিংকু বৈশ্য আৰু প্ৰণৱ বৈশ্য নামৰ তিনিজন চোৰে ছাগলী ভক্ষণৰ চেষ্টা চলোৱাৰ সময়তে ৰাইজে ঘটনাটো প্ৰতক্ষ্য কৰে ৷ ৰাইজে ঘটনাটো প্ৰতক্ষ্য কৰাৰ পাছতে ভক্ষণ কৰিবলৈ লোৱা ছাগলীটো বৰলীয়া নৈত পেলাবলৈ চেষ্টা কৰিছিল প্ৰণৱ বৈশ্য নামৰ চোৰটোৱে ৷ ৰাইজে তিনিওটা চোৰকে কৰায়ত্ত কৰাৰ চেষ্টা কৰিছিল যদিও ৰাইজৰ হাতৰ পৰা পলায়ন কৰে প্ৰণৱ বৈশ্য আৰু পিংকু বৈশ্য ৷
উল্লেখ্য যে,ভক্তসকলে মনোবাঞ্জা পূৰণৰ বাবে ঐতিহাসিক শ্মশান কালী মন্দিৰত ছাগলী এৰি দিয়ে ৷ কিন্তু মন্দিৰত ছাগলী এৰি দিয়াৰ পিছতে ৰহস্যজনকভাৱে সন্ধানহীন হৈ পৰে ছাগলীবোৰ ৷ ৰাইজৰ অভিযোগ,ৰুবুল দাস সহ এই তিনি চোৰে প্ৰায়ে মন্দিৰৰ ছাগলী ভক্ষণ কৰি আহিছে ৷
লগতে পঢ়কঃ ছাগলী চোৰ কৰিবলৈ চুৰে এতিয়া ব্যৱহাৰ কৰে বিলাসী বাহন (Chevrolet)
