গুৱাহাটী, 25 মাৰ্চঃ এইবাৰ লোকসভা নিৰ্বাচনত প্ৰথম বাৰৰ বাবে অৱতীৰ্ণ হ'ব প্ৰবজন বিৰোধী মঞ্চৰ মূল হোতা তথা উচ্চতম ন্যায়ালয়ৰঅধিবক্তা উপমন্যু হাজৰিকা । গুৱাহাটী লোকসভা সমষ্টিৰ পৰা নিৰ্দলীয় হৈ প্ৰতিদ্বন্দিতা কৰিবলগা হাজৰিকাই ইটিভি ভাৰতৰ সৈতে এক আছুতীয়া সাক্ষাৎকাৰত অংশগ্ৰহণকৰে ৷ সাক্ষাৎকাৰত নিৰ্দলীয় প্ৰাৰ্থীজনে নিৰ্বাচনী বৈতৰণী পাৰ হ'বৰ বাবে কিদৰে প্ৰচাৰ অভিযান চলাইছে সেই সম্পৰ্কে ইটিভি ভাৰতক সবিস্তাৰে জনায় ৷ এন আৰ চি, খিলঞ্জীয়াক সুৰক্ষা দিয়াৰ উদ্দেশ্য আগত ৰাখি তেওঁ গুৱাহাটী সমষ্টিত ভোটাৰৰ মাজত প্ৰচাৰ অভিযান আৰম্ভ কৰিছে বুলি জনায় ৷ নতুন ভোটাৰক আকৰ্ষিত কৰিবৰ বাবে ফেচবুকত আৰম্ভ কৰা পেজটোৱেও ভাল সহাঁৰি লাভ কৰা বুলি মন্তব্য কৰে নিৰ্দলীয় প্ৰাৰ্থীজনে ৷
উদ্দেশ্য আৰু দায়িত্ব সম্বলিত 4 লাখ প্ৰচাৰ পত্ৰিকাও অসমীয়া, ইংৰাজী দুয়োটা ভাষাতে সকলোৱে বুজি পোৱাকৈ সহজ ভাষাৰে ভোটাৰৰ মাজত বিতৰণ কৰি সজাগতা সৃষ্টি কৰাৰ চেষ্টা কৰিব বুলি জনায় হাজৰিকাই ৷ লগতে প্ৰচাৰৰ বাবে সংগীতৰকথাও ভবা বুলিও তেওঁ মন্তব্য কৰে । নৱ প্ৰজন্মৰ অৰ্হতা বৃদ্ধি তথা ভৱিষ্যত সুৰক্ষাৰ ক্ষেত্ৰতো বিভিন্ন প্ৰচেষ্টা গ্ৰহণ কৰিব বুলি জনায় তেওঁ ৷ খিলঞ্জীয়াৰ সুৰক্ষাৰ স্বাৰ্থত নিৰ্বাচনত অৱতীৰ্ণ হোৱা বুলি জনোৱা হাজৰিকাই কিদৰে গুৰুত্বপূৰ্ণ সমষ্টিটোত তেওঁৰ প্ৰতিদ্বন্দীসকলক প্ৰত্যাহ্বান জনাব সেয়া লক্ষণীয় হ'ব ।
