নিউজ ডেস্ক,৮ জুলাই: ৰাজ্যত ল’ক ডাউন, সান্ধ্য আইন অব্যাহত থকাৰ মাজতে আইন অমান্য কৰি ব্ৰহ্মপুত্ৰৰ বুকুত এগৰাকী আৰক্ষী বিষয়াৰ বাৰ্থ দ্যে পাৰ্টী উদযাপন কৰা আটাইকেইগৰাকী আৰক্ষী বিষয়াক শাস্তিমূলক বদলিৰ নিৰ্দেশনা । শাস্তিমূলক বদলিৰ এই নিৰ্দেশনাত মহানগৰ আৰক্ষীৰ এগৰাকী উপ আৰক্ষী আয়ুক্ত, চাৰি গৰাকী সহকাৰী আৰক্ষী আয়ুক্ত, দুগৰাকীকৈ ভাৰপ্ৰাপ্ত বিষয়া, উপ-পৰিদৰ্শকৰ লগতে এগৰাকী সহকাৰী উপ-পৰিদৰ্শকৰ নাম অন্তৰ্ভূক্ত হৈছে ।
উল্লেখ্য যে, ৰাজ্যত ল’ক ডাউন, সান্ধ্য আইন অব্যাহত থকাৰ মাজতে চৰকাৰী নিৰ্দেশনা অমান্য কৰি ব্ৰহ্মপুত্ৰৰ বুকুত এগৰাকী আৰক্ষী বিষয়াৰ বাৰ্থ দ্যে পাৰ্টী উদযাপন কৰিছিল মহানগৰ আৰক্ষীৰ একাংশ বিষয়াই । ব্ৰহ্মপুত্ৰৰ লাচিত ঘাটত থকা অসম চৰকাৰৰ আভ্যন্তৰীণ জল পৰিবহণ বিভাগৰ এখন বিলাসী জাহাজত উদযাপন কৰা পাৰ্টীত উপস্থিত আছিল মহানগৰ আৰক্ষীৰ বহুকেইগৰাকী জ্যেষ্ঠ আৰু কণিষ্ঠ আৰক্ষী বিষয়া ।
ছচিয়েল মেডিয়াত আৰক্ষী বিষয়াসকলৰ এনে কৰ্ম-কাণ্ড ভাইৰেল হৈ পৰাৰ লগে লগে সৰ্বত্ৰে ব্যাপক প্ৰতিক্ৰিয়াৰ সৃষ্টি হৈছিল । আৰক্ষীৰ বিষয়াসকলৰ এনে দায়িত্বহীনতাক লৈ বিভিন্ন জনে প্ৰশ্ন কৰাৰ সময়তে ৰাজ্যৰ মুখ্যমন্ত্ৰীৰ নিৰ্দেশক্ৰমে তৎকালে হোৱাকৈ তদন্তৰ নিৰ্দেশ দিছিল মহানগৰ আৰক্ষী আয়ুক্ত গৰাকীয়ে ।
