দুপৰীয়া 3 বজাৰ শীৰ্ষ 10 বাতৰি

দুপৰীয়া 3 বজাৰ শীৰ্ষ 10 বাতৰি

অসমৰ খিলঞ্জীয়া লোকৰ জীৱন সুনিশ্চিত কৰাৰ দায়িত্ব চৰকাৰৰ । অসমৰ ভূমিপুত্ৰ সকলক দিবলৈ মাটি নাই বিদেশীক দিবলৈ মাটি আছে । ভোগালী বিহুৰ দিনাই লাইকা-দধিয়াবাসীৰ কাষত উপস্থিত হৈ এই মন্তব্য কৰে লুৰীনজ্যোতি গগৈয়ে ।

বৃহস্পতিবাৰৰ লেখীয়াকৈ শুকুৰবাৰে পুৱাৰ ভাগতো বিশ্বনাথত বনৰীয়া ম’হে প্ৰাণ কাঢ়িলে আন এজন লোকৰ ৷ মৃত লোকজন শলমাৰীৰ শুকুৰ আলী বুলি চিনাক্ত ৷ অৱশ্যে বন বিভাগৰ গুলীবৰ্ষণত মৃত্যু হয় বনৰীয়া ম’হটোৰ ৷

নলবাৰীত আলোচনা পন্থী আলফা নেতা ৰাজু বৰুৱাৰ গুৰুত্বপূৰ্ণ মন্তব্য ৷ চৰকাৰে বিচাৰিলে শান্তি চুক্তিত স্বাক্ষৰ কৰিবলৈ সাজু ৷ আলোচনা ইতিমধ্যে প্ৰায় সম্পূৰ্ণ হৈছে বুলি মন্তব্য নেতা গৰাকীৰ ৷

পাঞ্জাবৰ ৱাগা সীমান্তৰ দৰে অসম বাংলাদেশ সীমান্তত প্ৰতিদিনে চলিব পেৰেড । অসমৰ শিল্প আৰু বাণিজ্য বিভাগৰ আযুক্তৰ নিৰ্দেশত ইতিমধ্যে নিৰ্ধাৰণ কৰা হৈছে ভূমি । কৰিমগঞ্জৰ জিলা উপাযুক্ত আনবামুথান এমপিয়ে জনাইছে এই কথা ৷

সত্ৰীয়া ৰীতি নীতি তথা পৰম্পৰাৰে আজি বৰপেটা সত্ৰত জ্বলোৱা হ’ল মাঘৰ উৰুকাৰ মেজি ৷ ১৪ জানুৱাৰীত উৰুকা পালন কৰাৰ পাছত ১৫ জানুৱাৰীৰ পুৱা সত্ৰৰ নৈমিত্তিক প্ৰসংগৰে পিছত পূৰ্বপৰা চলি অহা ৰীতিৰে সত্ৰৰ টুপৰ চোতালত বিৰিণাৰে সজা মেজিত অগ্নি সংযোগ কৰা হয় ৷

শিৱসাগৰত পহিলা মাঘত ৰংপুৰ মেলা ৷ উদুলি মুদুলি ৰংঘৰৰ বাকৰি ৷ জাতি-জনগোষ্ঠীয় কৃষ্টি-সংস্কৃতিত জীপাল ৰংঘৰৰ চোতল ৷ বিহু নৃত্য, আও নগা সকলৰ যুদ্ধ নৃত্য, দেউৰী বিহু, হৰিণ নৃত্য, তিৱা নৃত্য আৰু মিচিং জনগোষ্ঠীয় ঐ:নিতমৰে মুখৰিত ৰংঘৰ ।

মটৰ শ্ৰমিক সংগঠনৰ যৌথ মঞ্চই অহা ২৭ জানুৱাৰীত ৰাজ্যজুৰি চকাবন্ধৰ আহ্বান জনাইছে ৷ চৰকাৰী পক্ষই সংগঠনটোৰ দাবীসমূহ মানি নোলোৱাৰ বাবেই এই সিদ্ধান্ত ল'বলৈ বাধ্য হোৱা বুলি মটৰ শ্ৰমিক সংগঠনৰ যৌথ মঞ্চই জানিবলৈ দিছে ৷

কলগাছিয়াৰ লাচাংগা গাঁও পঞ্চায়তত 23 লাখ টকা ব্যয় সাপেক্ষে বেকী নৈত নিৰ্মাণ কৰা ৰিং বান্ধত চৰকাৰী আঁচনিৰ ধন আত্মসাৎ কৰাৰ চেষ্টা কৰিছে ঠিকাদাৰে ৷ এই অভিযোগ স্থানীয় ৰাইজৰ ৷

বৃহস্পতিবাৰে নাৰায়ণপুৰত ৰাম মন্দিৰ নিৰ্মাণ অভিযানৰ কাৰ্যালয় মুকলি ৷ কাৰ্যালয়টোৰ জৰিয়তে বৃহত্তৰ নাৰায়ণপুৰ অঞ্চলৰ পৰা প্ৰস্তাৱিত ৰাম মন্দিৰ নিৰ্মাণৰ বাবে ভক্তৰ পৰা ধন সংগ্ৰহ কৰা আৰু জনসম্পৰ্ক গঢ়ি তোলা হ’ব বুলি উদ্যোক্তাসকলে মন্তব্য কৰে ৷

মাধৱদেৱৰ দ্বাৰা প্ৰতিষ্ঠিত ঐতিহাসিক ঢেকীয়াখোৱা বৰনামঘৰত সমবেত হৈছে ভক্ত । হাতে হাতে নৈবদ্য, বন্তি লৈ নেদেখা জনৰ ওচৰত আশিস বিচাৰি শৰণাপন্ন হৈছে ভক্ত সকল ।