11 বজাৰ দহটা শীৰ্ষ বাতৰি

11 বজাৰ দহটা শীৰ্ষ বাতৰি

চৰকাৰে দৰিদ্ৰ লোকৰ বাবে কল্যাণকামী আঁচনি গ্ৰহণ কৰিছে যদিও কাৰ্যত এইবোৰ আঁচনিয়ে ঢুকি নাপায় সমাজৰ একাংশ লোকক । যোৰহাটৰ বৃদ্ধ দম্পতীৰ দুৰৱস্থা দেখিলে চকু সেমেকিব আপোনাৰ । ভগা বেৰ, ঘৰৰ চালৰ জৰাজীৰ্ণ অৱস্থা । উৰুখা পজাত অতি কষ্টেৰে দিন অতিবাহিত কৰিছে বৃদ্ধ দম্পতীয়ে ।

গিয়াছ উদ্দিন নামৰ এগৰাকী ক’ভিড আক্ৰান্ত ৰোগীৰ মৃত্যুক কেন্দ্ৰ কৰি উদালী ক’ভিড কেয়াৰ কেন্দ্ৰত চিকিৎসকৰ ওপৰত জঁপিয়াই পৰে মৃত গিয়াছ উদ্দিনৰ আত্মীয় । যিয়ে যেনেকৈ পাইছে কেৱল প্ৰহাৰ কৰিছিল কৰ্তব্যৰত চিকিৎসকজনক । ক’ভিড কেয়াৰ কেন্দ্ৰটোৰ ভিতৰৰ পৰা প্ৰহাৰ কৰি বাহিৰলৈ উলিয়াই আনি মাটিত পেলাই আক্ৰমণ কৰিছিল চিকিৎসকজনক ।

এক লাখ নতুন নিযুক্তি প্ৰক্ৰিয়াৰ প্ৰথমটো পদক্ষেপ হিচাপে ইতিমধ্যে স্বাস্থ্য বিভাগে প্ৰকাশ কৰিছে প্ৰথমটো বিজ্ঞাপন । ৰাষ্ট্ৰীয় স্বাস্থ্য অভিযান (এন এইছ এম) ৰ ফালৰ পৰা প্ৰকাশ কৰা হৈছে ৮৯৬ টা ষ্টাফ নাৰ্চ পদৰ বাবে বিজ্ঞাপন ।

মাজুলী উন্নয়ন খণ্ডৰ অন্তৰ্গত ৰাৱনাপাৰ পঞ্চায়তৰ বৰবিলা বচাদলনীত এমজিএনৰেগাৰ অধীনত নিৰ্মাণ হোৱা প্লেটফৰ্মৰ কাম অতি নিম্নমানৰ হোৱাৰ অভিযোগ ৷ নিৰ্মাণৰ নামত আৱন্তিত সমুদায় ধন বিভাগীয় বিষয়া আৰু মধ্যভূগীয়ে মিলি আত্মসাত কৰাৰ অভিযোগ উত্থাপিত হৈছে ৷

লংকাৰ উদালিত সংঘটিত হোৱা চিকিৎসক প্ৰহাৰৰ ঘটনাৰ উচিত তদন্তৰ বাবে চি আই ডি বিভাগৰ বিষয়া বিবেকানন্দ দাসক প্ৰদান কৰা হ’ব দায়িত্ব ৷ সংবাদ মাধ্যমযোগে এই কথা প্ৰকাশ কৰে আৰক্ষী সঞ্চালক প্ৰধান ভাস্কৰ জ্যোতি মহন্তই ৷

বুধবাৰে ৰাজ্যজুৰি চিকিৎসকসলে ক’লা বেজ পৰিধান কৰাৰ উপৰি চিকিৎসাল সমূহৰ সাধাৰণ বহিঃবিভাগ পুৱা ৮ বজাৰ পৰা দিনৰ ২ বজালৈ বন্ধ ৰাখি প্ৰতিবাদ সাব্যস্ত কৰে উদালী কাণ্ডৰ বিৰুদ্ধে । ৰাজ্যৰ উজনিৰ পৰা নামনিলৈ বিভিন্ন প্ৰান্তত প্ৰতিবাদত বহা দেখা গৈছে চিকিৎসক আৰু চিকিৎসাকৰ্মী সকলক ৷

মহামাৰী কভিড নিয়ন্ত্ৰণৰ বাবে ৰাজ্যত ঘোষণা হোৱা মিনি লকডাউনত অধিক জুৰুলা হৈছে খাটিখোৱা লোকসকল ৷ বিপাঙত পৰিছে ধিঙৰ খেতিয়ক সকল ৷ পথাৰতে পকি, পথাৰতে গেলিছে উৎপাদিত ফচল ৷ গৰু-ছাগলীৰ খাদ্যলৈ ৰূপান্তৰিত খেতিয়কৰ কষ্টোপাৰ্জিত ফচল ৷

৩৬ লক্ষ্য টকা ব্যয় সাপেক্ষে মাজুলীত নিৰ্মাণ হৈছে ভাম্যমান নৌকা চিকিৎসালয় । মাজুলী শালমৰা শিল্পীয়ে নিৰ্মাণ কৰি উলিয়াইছে এই নৌকা চিকিৎসালয় খন । এই চিকিৎসালয়খনে চৰ-চাপৰিকে ধৰি দূৰ্গম অঞ্চলত বসবাস কৰা লোকৰ বাবে হ’ব অধিক সহায়ক ।

এফালে কৰ’ণা মহামাৰীৰ বাবে মানৱ জীৱন বিপন্ন হৈ পৰিছে; কিন্তু একে সময়তে ৰাজ্যত আইন শৃংখলা ভংগ কৰি আহিছে বিভিন্ন দুষ্কৃতিকাৰীৰ লগতে বিকৃত মানসিকতাৰ এচাম লোকে ৷ শেহতীয়াকৈ, হত্যা, ধৰ্ষণ, চিকিৎসক নিগ্ৰহৰ দৰে ঘটনাই উত্তাল কৰিছে ৰাজ্য ৷ এনে সময়তে ডুমডুমাৰ এখন হোটেলত সংঘটিত হৈছে কাম কৰি জীৱন নিৰ্বাহ কৰা এজন যুৱকক দুৰ্বৃত্তই চুৰিকাঘাট কৰাৰ ঘটনা ৷

লংকাৰ ফুলতলী ক’ভিড কেয়াৰ চেন্টাৰৰ পাচতেই কাছাৰৰ কাটিগড়াৰ কালাইন হাস্পতালত সংঘটিত হৈছে চিকিৎসকক আক্ৰমণৰ আন এক ঘটনা ৷ ঘটনা সন্দৰ্ভত ইতিমধ্যে আৰক্ষীয়ে চাৰিজন অভিযুক্তক আটক কৰিছে ৷