এক বজাৰ শীৰ্ষ দহটা বাতৰি...

এক বজাৰ শীৰ্ষ দহটা বাতৰি...

অপৰিবৰ্তিত হৈ আছে দৰং জিলাৰ বান পৰিস্থিতি । বিশেষকৈ যোৱা নিশাৰে পৰা ব্ৰহ্মপুত্ৰৰ পানী বৃদ্ধি পোৱাত চুবুৰীয়া ভূটানৰ পৰা নামি অহা নৈ সমুহৰ পানী বাঢ়িবলৈ লোৱাত জিলাখনৰ ন ন অঞ্চল প্লাৱিত হৈছে । শাকতোলা,ননৈ,নোৱানৈ,টাংনি আদি ব্ৰহ্মপুত্ৰৰ উপনৈ সমূহৰ পানী আজিও ফেনেফুটুকাৰে বাঢ়ি আছে ।

গুৱাহাটী মহানগৰীত দেওবাৰে নিশাৰ পৰা আৰম্ভ হৈছে ১৪ দিনীয়া লক​ ডাউন । লক​ ডাউনৰ নীতি-নিয়ম যাতে ভংগ নহয় ইয়াৰ প্ৰতি তীক্ষ্ণ দৃষ্টি ৰাখিছে মহানগৰ আৰক্ষী। সোমবাৰে পুৱাৰে পৰা মহানগৰীৰ ঠায়ে ঠায়ে সষ্টম হৈ পৰিছে আৰক্ষীৰ লোকসকল । নিয়ম ভংগকাৰীৰ বিৰুদ্ধে কঠোৰ ব্যৱস্থা গ্ৰহণ কৰিব আৰক্ষীয়ে ।

কৃত্ৰিম বানত বুৰ গ'ল বাইহাটা চাৰিআলিত মদনপুৰৰ শান্তিপুৰ । শান্তিপুৰৰ বাসিন্দাসকলৰ ৰান্ধনি ঘৰতো একাঠু পৰ্যন্ত পানী । নিশাৰ ধাৰাষাৰ বৰযুণৰ ফলত সৃষ্টি হয় এই বানৰ ।

কৰিমগঞ্জত সংখ্যালঘু ছাত্ৰ বৃত্তিৰ নামত সংঘটিত হৈছে বৃহৎ কেলেংকাৰী । কৰিমগঞ্জৰ গুনময়ী হাইস্কুলত সংখ্যালঘু বৃত্তিৰ নামত ব্যাপক কেলেংকাৰী সংঘটিত হোৱাৰ অভিযোগ তুলি কৰিমগঞ্জ নিলামবাজাৰ আৰক্ষী চকীত গোচৰ ৰুজু কৃষক মুক্তি সংগ্ৰাম সমিতিৰ ।

হোজাই জিলাৰ ঠেপেলাগুৰীৰ জনবহুল অঞ্চলত অৱস্থান কৰি আছে এটা বন্য হস্তীয়ে ৷ বিগত কেইবাদিন ধৰি হোৱা নেৰানেপেৰা বৰষুণৰ ফলত কপিলী নৈৰ জলপৃষ্ঠ বৃদ্ধি পোৱাত নৈৰ কাষৰীয়া অঞ্চলৰ লগতে বনাঞ্চলৰ বিস্তীৰ্ণ অঞ্চল বাঢ়নি পানীত প্লাৱিত হৈছে ৷ বন্য হস্তীটোৱে বানৰ পৰা ৰক্ষা পাবলৈ নিৰাপদ স্থানৰ সন্ধানত ওখ ঠাই বিচাৰি হোজাই-পশ্চিম কাৰ্বি আংলং পথৰ কোমোৰাকাটা সংৰক্ষিত বনাঞ্চলৰ মাজৰ ঠেপেলাগুৰীত ঘাইপথৰ মাজত আশ্ৰয় লৈছে ৷

৩৫ হাজাৰ ৮৯০ টকাৰ এখন বিদ্যুতৰ বিলক লৈ ক্ষোভিত বলিউডৰ অভিনেত্ৰী তাপসী পন্নু । কোনো নথকা এটা বাসগৃহত লক ডাউনৰ মাজতে ৩৫ হাজাৰ ৮৯০ টকাৰ এখন বিদ্যুতৰ বিল অহা বুলি টুইটাৰযোগে সদৰি কৰি এডানী ইলেক্ট্ৰিছিটিৰ বিৰুদ্ধে ক্ষোভ প্ৰকাশ কৰে তাপসীয়ে ।

কলগাছিয়াৰ ঘূগুবাৰীত সংঘটিত হৈছে এজন যুৱকৰ সন্দেহজনক হত্যাকাণ্ড । সৰভোগ আৰক্ষী থানাৰ অন্তৰ্গত ঘূগুবাৰী গাঁৱৰ বুলু ফকীৰৰ পুত্ৰ ছাইফুল ইছলাম (22) নামৰ যুৱকজনক চিপজৰী থকা অৱস্থাত মৃতদেহটো প্ৰত্যক্ষ কৰে ৰাইজে ।

ভয়ানকভাৱে গণ সংক্ৰমণ হ'বলৈ গৈ আছে যোৰহাট চহৰ। ২৮ জুনৰ দিনটোত দুটাকৈ অঞ্চল কন্টেইনমেন্ট জ'ন ঘোষণা কৰা লগতে দিনটোতে ১৮ জন লোকৰ দেহত কৰ'ণা পজিটিজ ধৰা পৰা পাছতো গা-লৰা নাই একাংশ নাগৰিকৰ ।

গৰ্ভাৱস্থাত আৰু শৈশৱ কালত ধূমপান কৰিলে,ইয়াৰ পৰা নিৰ্গত ধুৱাই দূষিত পৰিৱেশৰ লগত মিলিত হৈ শিশুটোৰ অত্যাধিক ওজন বৃদ্ধি কৰিব পৰা পৰিৱেশৰ সৃষ্টি কৰে ৷ শেহতীয়াকৈ এক গৱেষণাত প্ৰকাশ পাইছে এই কথা ৷

বিশ্বত এক কোটি অতিক্ৰম কৰিলে ক'ৰণা ভাইৰাছত আক্ৰান্ত লোকৰ সংখ্যা ৷ সমগ্ৰ বিশ্বত বৰ্তমানলৈ 1,02,38,287 গৰাকী ব্যক্তি এই ভাইৰাছত আক্ৰান্ত হোৱাৰ লগতে মৃত্যু হৈছে 5,04,078 গৰাকী লোক ৷ ইয়াৰে 55,53,107 গৰাকী ব্যক্তি আৰোগ্য লাভ কৰাৰ বিপৰীতে চিকিৎসাধীন হৈ আছে 41,85,457 গৰাকী ব্যক্তি ৷