গুৱাহাটী, ২০ ডিচেম্বৰ : বিশিষ্ট গল্পকাৰ, ঔপন্যাসিক, গৱেষক, অভিধান প্ৰণেতা তথা অধ্যাপক ড৹ প্ৰণৱজ্যোতি ডেকালৈ আগবঢ়োৱা হৈছে ২০২৩ বৰ্ষৰ সাহিত্য অকাদেমি বঁটা । বুধবাৰে ঘোষণা কৰা হয় সাহিত্য অকাদেমি বঁটা । ‘শ্ৰেষ্ঠ গল্প’ৰ বাবে অসমীয়া ভাষাত ড৹ প্ৰণৱজ্যোতি ডেকালৈ এই সন্মান আগবঢ়োৱা হৈছে । ২০২১ চনত প্ৰণৱজ্যোতি ডেকাৰ এই গল্প সংকলনখন প্ৰকাশ হৈছিল ।
২০২২ বৰ্ষত এই গ্ৰন্থখনে অসম প্ৰকাশন পৰিষদৰ বঁটা লাভ কৰিছিল । প্ৰণৱজ্যোতি ডেকাৰ কথা ক’বলৈ গ’লে ১৯৩৯ চনৰ ২১ জুলাইত কলকাতাত প্ৰণৱ জ্যোতি ডেকাৰ জন্ম হৈছিল । তেওঁৰ পিতৃ আছিল প্ৰথমজন অসমীয়া বিচাৰক হলিৰাম ডেকা । ১৯৫৫ গুৱাহাটীৰ ড’নবস্ক স্কুলৰ পৰা প্ৰৱেশিকা পৰীক্ষাত সুখ্যাতিৰে উত্তীৰ্ণ হৈ তেওঁ কটন কলেজ আৰু বেনাৰস হিন্দু বিশ্ববিদ্যালয়ত উচ্চ শিক্ষা গ্ৰহণ কৰিছিল । বেনাৰস হিন্দু বিশ্ববিদ্যালয়ৰ পৰা ১৯৬১ চনত ভূ-তত্ত্ব বিষয়ত স্নাতকোত্তৰ ডিগ্ৰী লাভ কৰা প্ৰণৱজ্যোতি ডেকাই পৰৱৰ্তী সময়ত লেনীনগ্ৰাড খনি বিদ্যালয়ৰ পৰা অৰ্থনৈতিক ভূ-তত্ত্ব বিষয়ত ডক্টৰেট ডিগ্ৰী লাভ কৰে ।
১৯৬৬ চনত গুৱাহাটী বিশ্ববিদ্যালয়ৰ ভূ-তত্ত্ব বিভাগৰ অধ্যাপক হিচাপে যোগদান কৰা প্ৰণৱজ্যোতি ডেকাই গুৱাহাটী বিশ্ববিদ্যালয়ৰ পৰাই অৱসৰ গ্ৰহণ কৰে । এগৰাকী গল্পকাৰ, ঔপন্যাসিক, গৱেষক, অভিধান প্ৰণেতা তথা অধ্যাপক হিচাপে পৰিচিত ড৹ প্ৰণৱজ্যোতি ডেকাই সৃষ্টিৰ বিশালতাৰে অসমীয়া সাহিত্যৰ ভঁৰাল চহকী কৰিছে । তেখেতৰ উল্লেখযোগ্য গ্ৰন্থসমূহ হৈছে কৈলাসনাথ, একুৰি বছৰৰ গল্প, এজাক এলেহুৱা কাউৰীৰ সাধু, বেৱাৰিছ লাছ আৰু অন্য গল্প, বিহুৱতী চৰাই আৰু শ্ৰেষ্ঠ গল্প আদি ৷
আনহাতে তেখেতৰ প্ৰৱন্ধ সংকলন হৈছে পৰমেশ্বৰ আছে নাই, চৰ্যাগীত আৰু বৌদ্ধ তন্ত্ৰ, ধৰ্মৰ প্ৰাণতত্ত্ব, Nilachal Kamakhya: Her History and Tantra, Scientific Evidence for Vedic Astrology, ৰত্নজ্যোতিষ আৰু বিজ্ঞান, Century old Castes, Tribes and Guild, জ্যোতি দ্বিভাষিকৰ বুৰঞ্জী, ৰূপোপজীৱিনী বনাম দেহোপজীৱিনী (প্ৰাপ্তবয়স্কৰ যৌনজ্ঞান গ্ৰন্থ) আদি । তেখেতে ৰচনা কৰা অভিধানখন হৈছে জ্যোতি দ্বিভাষিক অভিধান । তেখেতৰ আত্মজীৱনীমূলক গ্ৰন্থ হৈছে ‘সোণৰ চামুচ মুখত লৈ’ । আনহাতে বড়ো সাহিত্যৰ বাবে বিশিষ্ট লেখক নন্দেশ্বৰ দৈমাৰীলৈ আগবঢ়োৱা হৈছে সাহিত্য অকাদেমি বঁটা ৷
লগতে পঢ়ক : অসমৰ প্ৰাথমিক বিদ্যালয়ত জনজাতীয় ভাষাত প্ৰৱৰ্তন কৰা হ'ব পাঠ্যপুথি
