নিউজ ডেস্ক,6 মাৰ্চঃ পৰৱৰ্তী বিধানসভা নিৰ্বাচনক লক্ষ্য ৰাখি বিত্ত মন্ত্ৰী হিমন্ত বিশ্ব শৰ্মাই শুকুৰবাৰে ঘোষণা কৰা বাজেটত ন ন আঁচনি অন্তৰ্ভূক্ত কৰা হৈছে ৷ বিশেষকৈ চাহ বাগিচা অধ্যুষিত এলেকাৰ জনসাধাৰণক বিশেষভাৱে সামৰি সুকীয়া আঁচনি গ্ৰহণ কৰা হৈছে বাজেটত ৷ বাজেটত উত্থাপন কৰা অনুসৰি চাহ বাগিচাৰ গৰ্ভৱতী মহিলাসকলে মাতৃত্ব লাভৰ সময়ত বিশেষ সুবিধা লাভ কৰিব ৷ বাগিচাৰ অৱসৰ গ্ৰহণ কৰা ৰাজ্যৰ শ্ৰমিকসকললৈ বিশেষ সুবিধা প্ৰদান কৰা হ’ব ৷
উল্লেখ্য যে, বিত্ত মন্ত্ৰীৰ বাজেট ঘোষণাৰ পিছতে প্ৰতিক্ৰিয়া প্ৰকাশ কৰিছে চাহ বাগিচাৰ সৈতে জড়িত বিভিন্ন সংগঠনসমূহে ৷ অসম চাহ বাগিচা যৌথ সংগঠন, উত্তৰ-পূৱৰ চাহ সংগঠন আৰু ভাৰতীয় চাহ পৰিষদে বিত্তমন্ত্ৰী গৰাকীৰ এই ঘোষণাত সন্তোষ প্ৰকাশ কৰিছে ৷ লগতে মুখ্যমন্ত্ৰী, বিত্তমন্ত্ৰী আৰু উদ্যোগমন্ত্ৰীক চাহৰ ক্ষেত্ৰত গ্ৰহণ কৰা বিশেষ আঁচনিৰ বাবে ধন্যবাদ জ্ঞাপন কৰে ৷ বিশেষ চাহ আঁচনিৰ জৰিয়তে চৰকাৰে ৰাজ্যৰ চাহ বাগিচাসমূহত উৎপাদন হোৱা অৰ্থড’ক্স চাহৰ প্ৰতি কেজিত 7 টকাক ৰেহাই দিয়াৰ লগতে কৃষিখণ্ডত তিনিবছৰলৈ উৎপাদন কৰ ৰেহাই দিয়া হৈছে ৷ চাহ উদ্যোগবোৰলৈ ঋণৰ ক্ষেত্ৰত 3 শতাংশ হাৰে সুদ তথা মূলধনৰ সাহায্য আগবঢ়োৱা হ’ব ৷ সংকটৰ কবলত পৰা চাহ উদ্যোগসমূহৰ ক্ষেত্ৰত চৰকাৰৰ এই পদক্ষেপে বিশেষ সহায় কৰিব বুলি চাহ সংগঠনসমূহে ব্যক্ত কৰে ৷
গুৱাহাটীস্থিত অসমৰ একমাত্ৰ চাহ নিলাম কেন্দ্ৰৰ 50 বছৰীয়া বৰ্ষপুৰ্তিৰ লগত সংগতি ৰাখি ঘোষণা কৰা চাহ সংগ্ৰহালয় স্থাপনৰ খবৰে সুখৰ বতৰা কঢ়িয়াই আনিছে উদ্যোগটোৰ লগত জড়িত প্ৰতিগৰাকী ব্যক্তিলৈ ৷ উত্তৰ-পূৱ চাহ সংগঠন চমুকৈ নেতাৰ উপদেষ্টা বিদ্যানন্দ বৰকাকতিয়ে চৰকাৰক পূৰ্বতে গ্ৰীণ টি, হোৱাইট টী, পাৰপল টী, য়েল্ল’ টী, অ’লংগ টী আৰু প্ৰতিবিধ বিশেষ গুণাগুণেৰে ভৰপূৰ চাহৰ উৎপাদনৰ ক্ষেত্ৰত প্ৰতি কেজিত 7 টকাকৈ চৰকাৰে ৰেহাই ঘোষণাৰ পিছত ক্ষুদ্ৰ চাহ খেতিয়কসকলে উৎপাদনৰ বাবে উৎসাহ লাভ কৰিব বুলি প্ৰকাশ কৰে ৷ সম্প্ৰতি সমগ্ৰ বিশ্বতে সমাদৰ লাভ কৰা বিশেষ গুণাগুণেৰে ভৰপূৰ চাহ বছৰেকত প্ৰায় 70 মিলিয়ন কেজিকৈ উৎপাদন কৰি আহিছে চাহ খেতিয়কসকলে ৷ যি ৰাজ্যৰ মুঠ উৎপাদন হোৱা চাহৰ পৰিমাণৰ প্ৰায় 10 শতাংশ ৷ এই পদক্ষেপে গুণগত মান বঢ়োৱাৰ ক্ষেত্ৰতো সহায়ক হ’ব বুলি বৰকাকতীয়ে উল্লেখ কৰে ৷
বিত্তমন্ত্ৰী হিমন্ত বিশ্ব শৰ্মাই ঘোষণা কৰা বাজেটত চাহ বাগিচাৰ গৰ্ভৱতী মহিলাসকলে লাভ কৰা অনুদান 12,000 টকাৰ পৰা 18,000 টকালৈ বৃদ্ধি কৰিছে ৷ চাহ শ্ৰমিকসকললৈ 4 কেজিকৈ বিনামূলীয়া চেনি যোগান ধৰিব চৰকাৰে ইত্যাদি বিভিন্ন আঁচনিৰে সমৃদ্ধ সোণোৱাল চৰকাৰৰ অন্তিমখন বাজেটক আদৰণি জনাইছে ৰাজ্যৰ চাহ উদ্যোগৰ লগত জড়িত ভিন্ন সংগঠনসমূহে ৷
লগতে চাওকঃবাজেটক লৈ মুখ্যমন্ত্ৰী সৰ্বানন্দ সোণোৱালৰ লগতে অতুল বৰাৰ প্ৰতিক্ৰিয়া
