গুৱাহাটী, 13 ডিচেম্বৰ: গুৱাহাটীৰ পাণ্ডু লোককলনীত দেওবাৰে এক উত্তপ্ত পৰিস্থিতিৰ সৃষ্টি হয় । অঞ্চলটোৰ গাঁওবুঢ়া চডমা বাছফৰৰ বিৰুদ্ধে প্ৰতিবাদ সাব্যস্ত কৰে গাঁওখনৰ একাংশ লোকে ।
স্থানীয় ৰাইজৰ অভিযোগ অনুসৰি গাঁওবুঢ়া চডমা বাছফৰে নিশাৰ ভাগত ৰাইজৰ ওপৰত দীৰ্ঘদিনৰ পৰা অত্যাচাৰ চলাই আহিছিল ৷ লোকজনে মদ্যপান কৰি প্ৰথমে অঞ্চলৰ ৰাইজৰ লগত কাজিয়া সৃষ্টি কৰে ৷ ইয়াৰ পিচতে দা, ত্ৰিশূল আদিৰে শাৰীৰিক আক্ৰমণৰ চেষ্টা চলায় বুলিও অভিযোগ তুলিছে স্থানীয় লোকে ৷
অৱেশেষত ৰে'ল বিভাগৰ কৰ্মচাৰী চডমা বাছফৰৰ এনে কাণ্ডত উপায়হীন হৈ ৰাজপথলৈ ওলাই আহি ক্ষোভ প্ৰকাশ কৰে অঞ্চলটোৰ ৰাইজে ৷ তাৰ পাচতে এক উত্তপ্ত পৰিস্থিতিয়ে বিৰাজ কৰে সমগ্ৰ অঞ্চলটোত ৷ ইতিমধ্যে ঘটনা সন্দৰ্ভত ভুক্তভোগী ৰাইজে জালুকবাৰী আৰক্ষী থানাত এখন এজাহাৰ দাখিল কৰিছে ৷ উল্লেখ্য যে, চডমা বাছফৰে মন্দিৰৰ মাটি বেদখল কৰি অবৈধ সুৰাৰ বেহা চলাই অহাৰো অভিযোগ উত্থাপন কৰিছে স্থানীয় ৰাইজে ৷
