গুৱাহাটী, ১৪ আগষ্ট: বিজেপি দলৰ উদ্যোগত সোমবাৰে গুৱাহাটীৰ মাছখোৱা সাংস্কৃতিক প্ৰকল্পত ভাৰত বিভাজনৰ দিনটোক স্মৰণ কৰাৰ বাবে বিভাজন বিভীষিকা স্মৃতি দিৱস পালন কৰা হয় । অনুষ্ঠানত মুখ্য অতিথি অতিথি হিচাপে মুখ্যমন্ত্ৰী হিমন্ত বিশ্ব শৰ্মাই অংশগ্ৰহণ কৰে । সভাত ভাষণ দি মুখ্যমন্ত্ৰী হিমন্ত বিশ্ব শৰ্মাই কয়, বৃটিছে ভাৰত বিভাজন আনিছিল । বিভাজনে ভাৰতীয়সকলৰ মাজত দুৰ্যোগ নমাই আনিছিল ৷ বিভীষিকাৰ বলি হৈছিল । বিভাজন পাহৰি যাব নোৱাৰা এক বেদনা । ভাৰতৰ স্বাধীনতা আছিল খণ্ডিত স্বাধীনতা ।
অনুষ্ঠানত ভাষণ দি মুখ্যমন্ত্ৰী হিমন্ত বিশ্ব শৰ্মাই ৮০০ বছৰৰ মুছলমান আৰু বৃটিছ শাসনৰ বিষয়ে উল্লেখ কৰি কয়, এই ৮০০ বছৰ পৰাধীনতাৰ ইতিহাস হিচাপে চিহ্নিত হৈ আছে । তেওঁ কয়, স্বাধীনতা সংগ্ৰামত মহাত্মা গান্ধীৰ ভূমিকা আছিল অতুলনীয় । মহাত্মা গান্ধী এগৰাকী অবিম্বাদী নেতা আছিল । নাথুৰাম গডছেই গান্ধীক হত্যা কৰিছিল । গডছেৰ এই অপৰাধ অক্ষমনীয় অপৰাধ আছিল । তাক আমি ক্ষমা কৰিব নোৱাৰো ।
মুখ্যমন্ত্ৰীয়ে লগতে কয়, ভাৰত বিভাজন হিন্দু আৰু শিখসকলে বিচৰা নাছিল । ভাৰত বিভাজন মুছলীম লীগ, জিন্না আৰু ছাদুল্লাই বিচাৰিছিল । ভাৰত বিভাজন হিন্দুসকলৰ ওপৰত জাপি দিয়া হৈছিল । হিন্দুসকলে অখণ্ড ভাৰতত থাকিব বিচাৰিছিল । মুখ্যমন্ত্ৰীয়ে ভাৰত বিভাজনৰ বাবে দোষী কৰিব পৰা একমাত্ৰ ব্যক্তি হ'ল মুহম্মদ আলী জিন্না আৰু মুছলীম লীগ ।
সভাত বিজেপিৰ ৰাজ্যিক সভাপতি ভৱেশ কলিতা, গুৱাহাটী পৌৰ নিগমৰ মেয়ৰ মৃগেন শৰণীয়া, বিজেপিৰ নেতা জয়ন্ত দাস, তপন চন্দ্ৰ দাস আদি উপস্থিত আছিল । সভাৰ আৰম্ভণিতে শুক্লেশ্বৰ ঘাটৰ পৰা প্ৰাগজ্যোতিষ সাংস্কৃতিক প্ৰকল্পৰ প্ৰেক্ষাগৃহলৈ এক মৌন সমদল উলিওৱা হয় । মাছখোৱা প্ৰেক্ষাগৃহৰ সন্মুখ ভাগত ৰাইজৰ বাবে ১৯৪৭ চনৰ সেই এক ক’লা অধ্যায়ৰ কিছু দৃশ্য প্ৰদৰ্শনী কৰা হয় ।
