গুৱাহাটী, ১৯ অক্টোবৰঃ ক'ভিড পৰিস্থিতিৰ বাবে বিগত বৰ্ষৰ পৰা অনলাইন ক্লাছৰ ওপৰতে নিৰ্ভৰ কৰিছিল শৈক্ষিক ব্যৱস্থা । কিন্তু অসমত বাস্তৱ ক্ষেত্ৰত কিমান ফলপ্ৰসু হৈছিল অনলাইন শিক্ষা ? কাৰণ প্ৰযুক্তিগত ভাৱে অসম এতিয়াও বহু পিছপৰি আছে । তেনেস্থলত অনলাইন শিক্ষা ব্যৱস্থাই প্ৰায় সংখ্যক শিক্ষাৰ্থীকে সামৰি ল'ব পৰা নাই । এই কথা কেন্দ্ৰীয় চৰকাৰে প্ৰকাশ কৰা শেহতীয়া এক সমীক্ষাতো প্ৰকাশ পাইছে ।
সমীক্ষা মতে, তথ্য-প্ৰযুক্তি আৰু ইণ্টাৰনেট ব্যৱস্থা জীৱন-যাত্ৰাৰ অবিচ্ছেদ্য অংগ হৈ পৰা একবিংশ শতিকাত কম্পিউটাৰ আৰু ইণ্টাৰনেট সংযোগৰ পৰা বিচ্ছিন্ন অসমৰ অধিকসংখ্যক বিদ্যালয় । ২০১৯-২০ শিক্ষা বৰ্ষৰ প্ৰতিবেদনত উল্লেখ পোৱা মতে, অসমৰ মুঠ বিদ্যালয়ৰ ভিতৰত মাত্ৰ ১২.৭ শতাংশ বিদ্যালয়তহে আছে কম্পিউটাৰৰ সুবিধা । আনহাতে ৫.৮২ শতাংশ বিদ্যালয়ত আছে ইণ্টাৰনেট সংযোগ । সমগ্ৰ দেশত ৩৭ শতাংশ বিদ্যালয়ত কম্পিউটাৰৰ সুবিধা থকাৰ বিপৰীতে এই ক্ষেত্ৰত দেশৰ ভিতৰত অসমৰ স্থিতি সকলোতকৈ দুখলগা ।
একেদৰে বিদ্যালয়ত ইণ্টাৰনেট সংযোগ থকাৰ ক্ষেত্ৰটো অসমৰ অৱস্থা শোচনীয় । লক্ষণীয়ভাৱে কম্পিউটাৰ আৰু ইণ্টাৰনেট ব্যৱস্থাৰ সুবিধা উপলব্ধ হোৱা বিষয়টোৰ ক্ষেত্ৰত ৰাজ্যখনত চৰকাৰী বিদ্যালয়তকৈ ব্যক্তিগত বিদ্যালয়ৰ স্থিতি যথেষ্ট উন্নত । প্ৰতিবেদনত উল্লেখ পোৱা অনুসৰি, অসমত ব্যক্তিগত খণ্ডৰ ৪৩ শতাংশ বিদ্যালয়ত কম্পিউটাৰৰ সুবিধা থকাৰ বিপৰীতে ২৬.৪৬ শতাংশ বিদ্যালয়ত ইণ্টাৰনেট সংযোগ আছে ৷
আনহাতে চৰকাৰী বিদ্যালয় সমূহৰ ক্ষেত্ৰত মাত্ৰ ১১.৪৪ শতাংশ বিদ্যালয়ত কম্পিউটাৰৰ সুবিধা থকাৰ বিপৰীতে ৪.৩২ শতাংশ বিদ্যালয়তহে ইণ্টাৰনেট সংযোগ আছে । প্ৰতিবেদনত উল্লেখ পোৱা মতে, ৰাজ্যখনত মুঠ ৬৫,৯০ খন বিদ্যালয় আছে আৰু ইয়াৰ ভিতৰত ৪৭,১৫৭ খন চৰকাৰী, ৫,০২৪ খন চৰকাৰী সাহায্যপ্ৰাপ্ত, ৬,১৭৫৪খন বেচৰকাৰী আৰু ৭,৬৫২ খন অন্যান্য বিদ্যালয় ।
লগতে পঢ়কঃ পানবাৰী মছজিদৰ পৰিচালনা সমিতিক লৈ দুই সংগঠনৰ মাজত খণ্ড-যুদ্ধ
