গুৱাহাটী, ৮ নৱেম্বৰ: দেশজুৰি বুধবাৰে অবৈধ ৰোহিংগীয়া সৰবৰাহকাৰীৰ বিৰুদ্ধে চলিল তীব্ৰ অভিযান । এন আই এ আৰু বিভিন্ন ৰাজ্যৰ আৰক্ষীৰ সহযোগত ৰোহিংগীয়া সৰবৰাহকাৰীৰ বিৰুদ্ধে এই অভিযান চলে । অভিযানত অবৈধ ভাৱে ৰোহিংগীয়া বাংলাদেশীক ভাৰতত প্ৰৱেশ কৰোৱা ৪৭ দালালৰ লগতে মধ্য়স্থতাকাৰীক গ্ৰেপ্তাৰ কৰে । আজি গুৱাহাটীত আয়োজিত এক সংবাদমেলত এই বিষয়ে সদৰী কৰিছে অসম আৰক্ষীৰ বিশেষ সঞ্চালক প্ৰধান হৰমিট সিঙে । তেওঁ কয় যে এই লোকসকলে ৰোহিংগীয়াক বাংলাদেশী সজাই ভাৰতত অনুপ্ৰৱেশ কৰাই আছে ।
অসম আৰক্ষীৰ বিশেষ সঞ্চালক প্ৰধান হৰমিট সিঙে উল্লেখ কৰা অনুসৰি ত্ৰিপুৰাত ২৫, অসমত ৫, পশ্চিমবংগত ৩ , কৰ্ণাটকত ৯, হাৰিয়ানাত ১, টেলেংগানাত ১, তামিলনাডুত ৩ জন দালালক এ এন আই এ আৰু বিভিন্ন ৰাজ্যৰ আৰক্ষী গ্ৰেপ্তাৰ কৰিছে । এই কথা বুধবাৰে সংবাদমেল যোগে সদৰী কৰি অসম আৰক্ষীৰ বিশেষ সঞ্চালক প্ৰধান হৰমিট সিঙে কয় ," ফেব্ৰুৱাৰীৰ পৰা অবৈধ ৰোহিংগীয়াৰ বিৰুদ্ধে আমাৰ অভিযান আৰম্ভ হৈছিল ৷ কৰিমগঞ্জ আৰক্ষীয়ে বাংলাদেশৰ পৰা ত্ৰিপুৰা হৈ ভাৰতৰ বিভিন্ন স্থানলৈ প্ৰৱেশ কৰিবলৈ অহা ৰোহিংগীয়াৰ ৪৫০ জনীয়া এটা দলক ঘূৰাই পঠিয়াই । ইয়াৰ পিছত এছ টি এফে জুলাইত চলোৱা অভিযানত অবৈধভাৱে ৰোহিংগীয়া বালাংদেশীক ভাৰতবৰ্ষৰ বিভিন্ন স্থানলৈ লৈ সৰবৰাহ কৰা ১০ জন দালালক গ্ৰেপ্তাৰ হয় । "