গুৱাহাটী, 03 ছেপ্টেম্বৰ: মূল্যবৃদ্ধি জুইয়ে দহিছে ৰাজ্য ৷ অত্যাৱশ্যকী খাদ্য-সামগ্ৰীৰ দামবৃদ্ধিয়ে দহিছে খাতিখোৱা সৰ্বসাধাৰণ জনতাক ৷ বস্তুৰ মূল্য শুনি মূৰে-কপালে হাত দিব লগা হৈছে জনতাই ৷ মূল্যবৃদ্ধিৰ প্ৰসংগত বহু সময়ত শাসকীয় মন্ত্ৰী-বিধায়কসকলে টুলুঙা মন্তব্যও প্ৰদান কৰা পৰিলক্ষিত হয় ৷
দেওবাৰে মূল্যবৃদ্ধি সন্দৰ্ভত মন্তব্য কৰি খাদ্য খোৱাৰ নতুন ৰেছিপি দিলে দিশপুৰ সমষ্টিৰ বিধায়ক অতুল বৰাই ৷ বিলাহীৰ মূল্যবৃদ্ধি সন্দৰ্ভত মন্তব্য কৰি বিধায়কগৰাকীয়ে কয় যে, বিলাহীৰ দাম বেছি; সেইবাবে কিনিব নালাগে ৷ বিলাহীৰ সলনি টমেট’ চ'চৰ ২ টা পেকেট লৈ মাছত দিলেই হ’ল, মাছ-বিলাহীৰ তৰকাৰী হৈ যায় ৷ মানুহে খাবই নাজানে বুলি মন্তব্য কৰে তেওঁ ৷
লগতে বিধায়কগৰাকীয়ে হাতত জিকা লৈ মন্তব্য কৰি কয় যে, এটা গুটি ৰুলে জিকাৰ গছ ঘৰতেই হয় ৷ নিজে খোৱাৰ উপৰিও ওচৰ-চুবুৰীয়াক দিব পৰাকৈ জিকা লাগে, কিন্তু আমাৰ মানুহে খেতি নকৰে ৷
শনিবাৰে ডিমৰীয়া কলেজত অনুষ্ঠিত হোৱা ৰাইজমেলত সৃষ্টি হোৱা এক উত্তপ্ত পৰিস্থিতি সন্দৰ্ভত দেওবাৰে সংবাদমেল সম্বোধন কৰি মূল্যবৃদ্ধিৰ বিষয়তো মন্তব্য কৰে বিধায়ক অতুল বৰাই ৷ উল্লেখ্য যে মূল্যবৃদ্ধি সম্পৰ্কে পূৰ্বেও মন্তব্য প্ৰকাশ কৰিছিল বিধায়কগৰাকীয়ে ৷
মিঠাতেলৰ মূল্যবৃদ্ধি সন্দৰ্ভত বিধায়কগৰাকীয়ে মূল্যবৃদ্ধিৰ পৰা হাত সাৰিবলৈ ৰাইজক মিঠাতেল কমকৈ খাবলৈ পৰামৰ্শ দিছিল ৷ এক লিটাৰ মিঠাতেল কিনা লোকজনক ৫০০ গ্ৰাম মিঠাতেল কিনাৰ অভ্যাস কৰিবলৈ আহ্বান জনাইছিল ৷ তদুপৰি মূল্যবৃদ্ধিৰ পৰা হাত সাৰিবলৈ ঘৰুৱা শাক-পাচলি খোৱাৰ অভ্যাস কৰিবলৈ পূৰ্বেও আহ্বান জনাইছিল বিধায়কগৰাকীয়ে ৷
ইফালে ৰাইজমেলৰ সমগ্ৰ ঘটনা সন্দৰ্ভত সংবাদমাধ্যমৰ ভূমিকা সন্দৰ্ভত মন্তব্য কৰি বিধায়কগৰাকীয়ে কয় যে, "মইয়ো এটা পর্টেল খুলিম, চেনেল খুলিলেহে পইচা লাগে ৷ পৰ্টেলত কোনো চিন্তা নাই ৷ মইও ৰাতিপুৱা মৰ্নিং ৱাক কৰো, শ্ৰীৰঘুপতি যে হৈ থাকো সেইটো দেখুৱাম ৷ কেতিয়াবা মই আজ্ঞাঠুৰী গণেশ মন্দিৰ গৈ পাওঁ, কেতিয়াবা আকৌ বগলা মন্দিৰ গৈ পাওঁ ৷ এইসমূহ সকলো পৰ্টেলত দেখুৱাম ।"
লগতে পঢ়ক : MLA Atul Bora Press Meet: ডিমৰীয়া মহাবিদ্যালয়ৰ বিত্তীয় কেলেংকাৰী সন্দৰ্ভত বিধায়ক অতুল বৰাৰ সংবাদমেল
