গুৱাহাটী, ১০ জুন : খোদ আৰক্ষী শিশু নিৰ্যাতনৰ অভিযোগত অভিযুক্ত হোৱাৰ পিচত অসম আৰক্ষীৰ উচ্চ পৰ্যায়ৰ বিষয়াৰ বদলি ঘটাবলৈ বাধ্য হৈছে অসম চৰকাৰৰ গৃহ আৰু ৰাজনৈতিক বিভাগ (Reshuffle In Assam Police) ৷ শনিবাৰে অসম আৰক্ষীত আৰক্ষী অধীক্ষক পৰ্যায়ত কেইটামান গুৰুত্বপূৰ্ণ বদলি ঘোষণা কৰা হয় ৷ গৃহ আৰু ৰাজনৈতিক বিভাগৰ জাননী অনুসৰি ধুবুৰীৰ আৰক্ষী অধীক্ষক অপৰ্ণা নটৰাজনক (SP Arpana Natrajan) বদলি কৰা হৈছে ৷ ধুবুৰীৰ আৰক্ষী অধীক্ষক পদৰ পৰা নটৰাজনক দেৰগাঁওস্থিত লাচিত বৰফুকন পুলিচ একাডেমীৰ অধ্যক্ষ ৰূপে বদলি কৰা হৈছে (Dhubri SP transferred) ৷
আনহাতে বদলি কৰি হৈছে বিশ্বনাথৰ আৰক্ষী অধীক্ষকগৰাকীক (SP Navin Singh) ৷ অপৰ্ণা নটৰাজনৰ ঠাইত ধুবুৰীৰ আৰক্ষী অধীক্ষকৰূপে দায়িত্ব গ্ৰহণ কৰিব বিশ্বনাথৰ আৰক্ষী অধীক্ষক নবীন সিঙে (Biswanath SP transferred) ৷ খালী হ’বলগীয়া বিশ্বনাথত আৰক্ষী অধীক্ষক হিচাবে দায়িত্ব গ্ৰহণ কৰিব শুভাশিষ বৰুৱাই ৷ শুভাশিষ বৰুৱাই গুৱাহাটীৰ উলুবাৰীৰ মুখ্য কাৰ্যালয়ত সহকাৰী মহাপৰিদৰ্শক (প্ৰশাসনীয়) ৰূপে কাৰ্যনিৰ্বাহ কৰি আহিছিল (Asst IGP Subhasish Baruah) ।
মন কৰিবলগীয়া যে অসম আৰক্ষীৰ এই বদলি বিশেষ গুৰুত্বপূৰ্ণৰূপে বিবেচিত হৈছে ৷ কিয়নো ধুবুৰীৰ আৰক্ষী অধীক্ষক তথা ২০১৪ বৰ্ষৰ আইপিএছ অপৰ্ণা নটৰাজন শেহতীয়াভাৱে এক বিতৰ্কত সোমাই পৰিছিল ৷ আনকি উচ্চ ন্যায়ালয়েও নটৰাজনক ভৰ্ৎসনা কৰিব লগা হৈছে ৷ ধুবুৰীৰ বিলাসীপাৰাত হোৱা এটা হত্যাকাণ্ডৰ ঘটনাত কোনো গোচৰ অবিহনেই দুগ্ধপুষ্য শিশুকে ধৰি দুটি সন্তানসহ ৰাকিয়া খাতুন নামৰ এগৰাকী মাতৃক কেইবাদিনো ধৰি লকআপত ৰাখিছিল ধুবুৰী আৰক্ষীয়ে (Dhuri child harassing case) ৷
পৰৱৰ্তী পৰ্যায়ত এই ঘটনা গৈ পায়গৈ উচ্চ ন্যায়ালয়ৰ মজিয়া ৷ উচ্চ ন্যায়ালয়ে (Gauhati High Court) ঘটনাটো যথেষ্ট গুৰুত্ব সহকাৰে লৈ প্ৰয়োজনত চিবিআইৰ তদন্তৰো পোষকতা কৰে ৷ আনকি গুৱাহাটী উচ্চ ন্যায়ালয়ে ধুবুৰীৰ আৰক্ষী অধীক্ষক অপৰ্ণা নটৰাজনক প্ৰশ্নও কৰিছিল যে এগৰাকী মহিলা হৈ কেনেকৈ এনে দয়াহীন কাম কৰিব পাৰে ? শিশু দুটিক লৈ অলপো দয়া ওপজা নাছিল নে ?
ইয়াৰ পিচতেই ধুবুৰী আৰক্ষীৰ এই কাণ্ডক লৈ অস্বস্তিৰ সন্মুখীন হয় অসম আৰক্ষী ৷ সেয়ে সহজেই অনুমেয় যে ধুবুৰী কাণ্ডক লৈ ন্যায়ালয়ৰ কঠোৰ পদক্ষেপৰ পিচত ধুবুৰীৰ আৰক্ষী অধীক্ষকগৰাকীক বদলি কৰিবলৈ বাধ্য হ’ল অসম আৰক্ষী ৷ কিয়নো ইতিমধ্যে এছ আই জোনমণি ৰাভাৰ ৰহস্যজনক হত্যাকাণ্ডই অসম আৰক্ষীৰ ভিতৰৰ অন্ধকাৰাছন্ন কলংকৰ এটা দিশৰ স্বৰূপ উদঙাই দেখুৱাইছেই ৷ তাৰ পিচতেই এগৰাকী আৰক্ষী অধীক্ষকে শিশু নিৰ্যাতন কৰাৰ দৰে অভিযোগত ন্যায়ালয়ৰ ভৰ্ৎসনাৰ সন্মুখীন হ’ব লগীয়া হয় ৷ যিটো অসম আৰক্ষীৰ বাবে নিশ্চয়েই লজ্জাজনক ৷
লগতে পঢ়ক: Reshuffle in Assam Police: নগাঁও আৰক্ষীত এইবাৰ ভাৰপ্ৰাপ্ত বিষয়াৰ পৰ্যায়ত ৰদ বদল
